Bashkëshortja e ministrit të Zhvillimit Ekonomik në qeverinë e Kosovës, Vitore Metaj Stavileci, sot, është dhunuar nga disa persona ende të paidentifikuar.
Mediat kosovare shkruajnë se ngjarja ka ndodhur rreth orës 14:00, pikërisht në ditën e përvjetorit të martesës së çiftit Stavileci.
Stavileci është dërguar menjëherë në Qendrën Emergjente për të marrë ndihmën e parë mjekësore, ndërsa pas pak minutash mësohet se ka mbërritur edhe bashkëshorti, ministri Blerand Stavileci.
Burimet nga policia e Kosovës thanë se po hetohet rreth ngjarjes dhe autorëve të sulmit.
Menjëherë pas këtij akti, përmes një deklarate për mediat, Partia Demokratike e Kosovës tha se pas sulmit fshihen aktivistë të Levizjes së Vetvendosjes.
Sipas deklaratës, ditën e sotme, në mesditë, kriminelët e Vetvendosjes kanë sulmuar dhe rrahur brutalisht bashkëshorten e ministrit Blerand Stavileci, ndërsa nënvizohet se para se të jetë bashkëshorte e një politikani, ajo është nënë.
Më tej, PDK, tregon se pas lëndimeve të marra si pasojë e sulmit Stavileci po trajtohet në QKUK.
“Blerandi Stavileci ka qenë një nga zërat më të theksuar për mospunën dhe keqpërdorimet e shumta në komunën e Prishtinës, nga zyrtarët më të larta të Lëvizjes Vetëvendosje”, tha Uran Ismajli, nënkryetar i Partisë Demokratike të Kosovës.
PDK tha se pas sulmit fizik, bashkëshortes së ministrit i është thënë që t’i përcjellë porosi të qarta Blerandit, duke e paralajmëruar që të mosë flasë shumë dhe pas këtij veprimi a do guxojë të flasë më.
PDK kërkon që organet e rendit të kapin autorët e përfshirë në ngjarje dhe vënien e menjëhershme të tyre para drejtësisë.
Zyrtarë të Lëvizjes Vetëvendosje hodhën poshtë pohimet e Partisë Demokratike dhe e dënuan sulmin ndaj zonjës Stavileci.
Dardan Sejdiu deputet i kësaj lëvizjeje shkroi në rrjetet sociale se “janë për keqardhje deklaratat e zyrtarëve të lartë të PDK-së që pa asnjë fakt akuzojnë Vetëvendosjen në lidhje me këtë rast, duke ndërhyrë në punën e organeve kompetente, që do të duhej sa më parë ta zbardhnin këtë akt kriminal. Ngutja e PDK-së për të akuzuar aktivistët e VV-së nuk përbën vetëm papjekuri të skajshme politike, por edhe lë hapësirë për dyshime rreth inskenimeve të mundshme qëllimkëqija, çka me siguri se nuk do të përbënte risi“, shkruan ai.
Sulmi u dënua edhe nga presidenti i Kosovës, Hashim Thaci dhe kryeministri në detyrë, Isa Mustafa, por edhe partitë politike që kërkuan ndriçimin sa më të shpejtë të këtij incidenti,
Sulmi i sotëm ndodhë në një periudhë të ashpërsimit të gjuhës politike para zgjedhjeve për pushtetin komunal që do të mbahen më 22 tetor dhe të debateve të rrepta rreth zvarritjes së ngritjes së institucioneve të Kosovës në bazë të zgjedhjeve të parakohshme të 11 qershorit.
