Banesa e një kambisti u grabit mbrëmjen e së shtunës në Maliq të Korçës. Nga hetimet paraprake dyshohet se grabitësit kanë arritur të marrin rreth 3 milionë lekë (të vjetra). Zonja e shtëpisë është ndeshur me grabitësit në oborr kur i ka kapur duke nxjerr plackat jashtë.
“Kur u ktheva në shtëpi, pashë në oborr tre persona. Ata ishin të maskuar dhe të armatosur. Policë s’kishte. Hajdutët i pashë me televizor në dorë. Ishin të rinj. Njërit prej tyre i ra arma nga dora. Po nuk vuri dorë shteti, do të vë vetë, se është hera e dytë që më vjedhin shtëpinë”, tha bashkëshortja e kambistit.
Ndërsa, kambisti Vilson Mara, kërkoi ndihmën e policisë duke telefonuar nr.129, por numri dilte i padisponueshëm. Sipas tij, edhe disa orë pas grabitjes, ky numër vijonte të ishte i padisponueshëm. Të kërcënuar në të drejtën e tyre të pronës dhe jetës, bashkëshortët Mara i bënë apel policisë që të zbardhë ngjarjen dhe të kapë autorët. “I kam rënë disa herë policisë edhe tek numri 911, edhe tek 129. U detyrua gruaja të gjente policët rrugëve”, pohoi kambisti.
