Të ardhurat buxhetore për periudhën janar nëntor 2015 ishin 343.4 miliardë lekë, sipas statistikave zyrtare të Ministrisë së Financave, duke shënuar një rritje prej 4.3% në raport me të njëjtën periudhë të vitit të kaluar. Megjithatë, rritja reale është zero, duke pasur parasysh se inflacioni është rreth 2% dhe rritja ekonomike e pritshme mes 2.3-2.5%.
Në raport me planin e rishikuar në mes të vitit, financave u mungojnë 15 miliardë lekë. Në krahasim me planin fillestar, buxhetit të shtetit i “mungojnë” rreth 30 miliardë lekë. Kujtojmë se buxheti u rishikua në ulje në fund të muajit gusht, si rrjedhojë e performancës së dobët të të ardhurave, duke e kthyer në “pikën zero“ në raport me planin dhe mosrealizimi prej 15 miliardë lekësh ka ardhur vetëm për periudhën shtator-nëntor.
Nga 15 miliardë lekë, që është mosrealizimi i planit për 11 mujorin, 10.6 miliardë lekë është nga të ardhurat tatimore e doganore dhe pjesa tjetër nga të ardhurat jo tatimore.
Të ardhurat nga tatimet e doganat janë rritur me 1.7% me bazë vjetore për 11 mujorin, duke qenë me rritje reale negative prej rreth 2.5% (minus rritjen ekonomike dhe inflacionin).
TVSH, zëri kryesor i të ardhurave në buxhet dhe një tregues direkt i qarkullimit në ekonomi, shënoi një rënie prej 0.1% në raport me 11 mujorin 2014 dhe ishte 4.4 miliardë lekë më pak se plani. Rënia e importeve të disa mallrave (si energjia, cigaretet), ulja e çmimit të karburanteve, janë disa nga arsyet e kësaj tendence.
Të ardhurat nga tatim fitimi u rritën me 12.8% në 21.8 miliardë lekë, duke qenë zëri që është më afër planit.
Akciza vijon me ecurinë negative, duke rëne me 5.3% me bazë vjetore, në rreth 36 miliardë lekë. Ky është zëri i dytë me mosrealizimin më të lartë në raport e planin, -4 miliardë lekë. Rënia e importeve të cigareve është raportuar si arsyeja kryesore e kësaj tendence negative. Ndonëse konsumi nuk vlerësohet në rënie, zhvendosja drejt duhanit vendas dhe rritja e kontrabandës janë arsyet kryesore të kësaj ecurie. ( Lexo: Shperndaresit zyrtare, kontrabanda e cigareve eshte rritur)
Tatimi mbi të ardhurat personale është rritur 7.8% në raport me janar-nëntor 2014, por sërish është me një mosrealizim prej gati 2 miliardë lekësh në raport me planin. Ndonëse tatimi mbi të ardhurat personale u rrit në janar në këtij viti nga 10 në 15%, faktorë të tjerë kanë ndikuar në kahun e kundërt, si psh ulja e normave të interesit në banka.
Taksat nacionale dhe të tjera janë rritur me 6%, duke qenë më afër planit. Ky zë ka performuar më mirë muajt e fundit, ndonëse renta, që ka peshën kryesore, është në rënie, për shkak të uljes së çmimeve të naftës. Taksat nacionale përfshijnë dhe elemente të tjerë si gjobat, që duket se i kanë dhënë hov këtij zëri.
Të ardhurat nga pushteti vendor ranë me 6%, ku efektin kryesore e ka pasur taksa lokale, që ka performuar dobët me ndërrimin e kryetarëve të bashkive dhe kalimin drejt ndarjes së re territorial.
Të ardhurat nga kontributet e sigurimeve shoqërore e shëndetësore, janë zëri me ecurinë më të mirë, si në raport me vitin e kaluar, ashtu dhe planin, duke u rritur përkatësisht me 8% dhe 11%. Hyrja neto në skemë e rreth 80 mijë të punësuarve, në kuadër të aksionit antiinformalitet duket se ka dhënë rezultat pozitiv në këtë zë.
Të ardhurat jo tatimore, ndonëse kanë shënuar një rritje të kënaqshme në raport me janar nëntor 2014, (duke ndikuar në 33% të rritjes së të hyrave në total në vlerë absolute për shkak të të arhdurave nga licencat e kompanive celulare në pjesën e parë të vitit), sërish janë 3.5 miliardë lekë më pak se plani./monitor/
