Emisioni “BOOM” ka transmetuar pamjet ku tregohet gjendja skandaloze e qendrës shëndetësore që mbulon 600 banorë të fshatit Grizë në Fier.
Pa drita ,pa ujë, pa tualet dhe e pushtuar nga lagështia, kjo është panorama e ambulancës në fshatin Kraps Grizë të Fierit. Sikur të mos mjaftonte ky fakt, ka 4 muaj që këtu mungon mjeku i familjes dhe banorët duhet te bejne 10 km rrugë në kembë deri në Qendrën Shëndetësore më të afërt.
Kjo është zgjidhja për ata që kanë këmbet e forta ose një makinë, ndërsa të moshuarit që vuajnë nga sëmundje të rënda presin fundin e tyre në krevat pa pasur mundësi të vizitohen.
Një e moshuar thotë se ka një vit e gjysmë që i blen ilaçet bashkëshortit vetëm me anën e kutive të vjetra, pa bërë asnjë vizitë. Ndërsa një tjeter pensionist ka një ‘propozim’ interesant, duhet të miratohet një ligj ku të saktësohet se në fshat njerëzit duhet të sëmuren vetëm një herë në javë meqë mjeku duhet të shkojë atje vetëm 4 herë në muaj.
Në kufijtë e lutjes banorët i kërkojnë Ministrisë së Shëndetësisë vetëm një mjek dhe kjo si provë bindëse se shëndetesia ka rilindur./Opinion.al
