Europa po kalon gripin “më shkatërrues” të shpendëve të regjistruar ndonjëherë në Kontinentin e Vjetër për më shumë se një vit, pasi rreth 50 milionë zogj janë therur në fermat ku u zbulua virusi, njoftuan sot autoritetet shëndetësore.
Nga tetori 2021 deri në shtator 2022 Evropa po goditet nga “gripi i shpendëve shumë patogjenik (HPAI)”. 37 vende janë prekur dhe 2500 shpërthime janë identifikuar në ferma, sipas raportit të Autoritetit Evropian të Sigurisë Ushqimore (EFSA), Qendrës Evropiane për Parandalimin dhe Kontrollin e Sëmundjeve (ECDC).
Humbjet në pula, rosa apo gjela në fermat e shpendëve janë në fakt më të larta pasi numri i 50 milionë zogjve të therur nuk përfshin therjet për arsye parandaluese rreth rasteve të sëmundjes.
Infeksionet e gripit të shpendëve u dyfishuan me afrimin e dimrit.
Autoriteti Evropian i Sigurisë Ushqimore thekson se “për herë të parë” nuk ka pasur pushim mes dy valëve të epidemisë, pasi virusi nuk u zhduk në verë. Dhe kur erdhi vjeshta, epidemia u duk se u përkeqësua në krahasim me vitin e kaluar, me raste të regjistruara në më shumë se 35% të fermave të shpendëve. Nga 10 shtatori deri më 2 dhjetor, rreth 400 shpërthime u zbuluan në 18 vende evropiane, me shumicën e tyre në Francë, Britani dhe Hungari.
Virusi është zbuluar gjithashtu më shumë se 600 herë te shpendët e egër, veçanërisht te shpendët e ujit (rosat, mjellmat).
Me kërkesë të Komisionit Evropian po shqyrtohet disponueshmëria e vaksinave për HPAI dhe po studiohen strategjitë e mundshme të vaksinimit.
