Ministri i Shëndetësisë ka raportuar sot për situatën gripale në vend, gjatë mbledhjes së shtabit të emergjencave që u zhvillua në Kryeministri. Pasi u raportua për gjendjen e rrugëve të bllokuara nga bora, fjalën e mori Beqaj për të treguar masat që ka marrë për gripin. Ai tha se është duke u diskutuar për mbajtjen mbyllur të shkollave edhe për javën në vazhdim. Ai njoftoi pezullimin e operacioneve të planifikuara në spitale dhe anuliminin e aktiviteteve kulturore në vend.
Ministri Beqaj tha se mund të konsiderohet epidemi gripi pasi janë me mijëra të prekur në gjithe vendin. Ai nuk pranoi faktin se masat kanë nisur shumë vonë, duke thënë se që në Dhjetor Ministria e Shëndetësisë ka marrë 2-3 masa të vogla. Sipas tij, shërbimi parësor po punon edhe ditëve të diela. Ndërsa lidhur me vaksinat ai tha se janë shpërndarë deri tani 61 mijë flakonë dhe janë edhe 30 mijë të tjera. Sipas ministrit vaksinat duhet ti bëjnë të moshuarit dhe të sëmurët kronikë.
Lidhur me masat, Beqaj u shpreh se “spitalet gjatë këtyre ditëve do të anulojnë operacionet e planifikuara, pra do të bëhen vetëm rastet urgjente. Janë çuar medikamentet në 16 qendra shëndetësore të zonave malore që bllokohen nga bora. Kemi nxjerr në TV kronika informative për gripin”. Po kështu ai tha se “ditët në vijim do të marrim në konsideratë faktin nëse do të mund të mbahen shkollat të mbyllura edhe gjatë javës së ardhshme. Gjithashtu do të sugjeronim edhe anulimin e aktiviteteve kulturore. Për këto të dyja do të dalim shpejt me një vendim”. /Opinion.al
