Sulmuesi francez i Atletico Madrid, Antoine Griezmann mund të rezervojë një vend në listën e futbollistëve të varur nga gjeste dhe veprime supersticioziteti, teksa nuk është parë kurrë të luajë me fanellë me mëngë të shkurtra. Një fiksim ky i 25-vjeçarit Griezmann që lidhet ngushtësisht me David Beckham. Griezmann, i cili ndonëse pa mundur dot të ngrejë Kupën e Europës, nuk doli pa trofe nga Kampionati Europian “Francë 2016”, teksa mori me vete në shtëpi “Këpucën e Artë”, ka zbuluar pse Beckham është arsyeja që në fushë, ai mban gjithmonë veshur fanellë me mëngë të gjata.
Futbollisti i përfaqësueses franceze pranoi se në fëmijëri ai ishte i apasionuar pas futbollit dhe se ndiqte në mënyrë të çmendur nga televizori David Beckham dhe se ish-futbollisti i Manchester United ka patur një ndikim dhe impakt të rëndësishëm në karrierën e tij. Në intervistën e tij, Griezmann përjetoi kujtimet e fëmijërisë së tij dhe zbuloi arsyen pse mban veshur fanellën me numrin 7 dhe mëngë të gjata. “E pëlqeja shumë David Beckham. Ai ishte idhulli im. Kjo është arsyeja pse në fushë mbaj gjithmonë veshur fanellën me numrin 7 dhe me mëngë të gjata”, deklaroi Griezmann.
Vitet e fundit, sulmuesi francez është përfolur shumë mbi një transferim të mundshëm në “Old Trafford” dhe tashmë që shoku i tij i kombëtares, Paul Pogba mbërriti te “Djajtë e Kuq”, afrimi i Griezman te United mund të bëhet fakt i kryer në muajt e ardhshëm. Kohët e fundit, 25-vjeçari foli në lidhje me transferimin e Pogba te Manchester United, sikurse paralajmëroi se një transferim i vetë atij në Premier League është një opsion i mundshëm në të ardhmen.
