Dhjetëra fluturime u anuluan në Portugali për shkak të një greve 3-ditore të thirrur nga stafi i aeroporteve të vendit.
Në të njëjtën kohë, ka shqetësime për ata që synojnë të udhëtojnë me avion edhe në Spanjë, ku të paktën 24 fluturime të Iberia Express, të planifikuara mes të dielës dhe të martës, janë anuluar për shkak të një proteste të ekuipazhit të kabinës.
Në Portugali janë afro 150 fluturime të anuluara deri më tani. Aeroportet e Lisbonës dhe Portos janë aeroportet kryesore ku janë verifikuar anomalitë.
Në Spanjë, greva e stafit të Iberia Express është planifikuar të zhvillohet midis 28 Gushtit dhe 6 Shtatorit. Gjatë kësaj periudhe ka edhe greva nga ekuipazhi i Ryanair si dhe nga pilotët e EasyJet nga nesër deri më 29 Gusht.
Anëtarët e sindikatës spanjolle të ekuipazhit të kabinës së kompanisë Ryanair planifikojnë një grevë nga e hëna në të enjten çdo javë deri më 7 Janar me kërkesë kryesore rritjen e pagës dhe kushte më të mira pune.
Punëtorët e Ryanair shkaktuan gjithashtu ndërprerje në shumë aeroporte spanjolle duke u larguar për disa ditë në Korrik, kryesisht në fundjavë.
Pothuajse në të gjitha këto raste punëtorët kërkojnë kushte më të mira pagash. Grevat dhe mungesa e personelit kanë detyruar linjat ajrore të anulojnë mijëra fluturime në Spanjë dhe Portugali për të shmangur radhët me orë të tëra në aeroportet kryesore.
Pas shkurtimeve gjithëpërfshirëse të punës dhe pagave gjatë kohës së kufizimeve të Covid-19, stafi në të gjithë industrinë e aviacionit civil, nga pilotët deri tek mbajtësit e bagazheve, po kërkojnë rritje të mëdha pagash dhe kushte më të mira pune.
