Franca është zhytur në kaos par grevës kundër reformës së pensioneve që ka propozuar Presidenti Macron.
Linjat e transportit në qytetet kryesore janë paralizuar dhe kjo ka sjellë probleme në aktivitetin ekonomik pasi qytetarët e kanë të vështirë të shkojnë në punë. Ato pak linja funksionale autobusësh dhe trenash kanë pësuar dyndje dhe kjo ka sjellë gjithashtu kaos.
Zemërimi i qytetarëve është shtuar dhe ka patur përplasje në shumë qytete mes policisë dhe protestuesve.
Ata qytetarë të cilët nuk kanë dashur të humbin ditën e punës kanë zgjedhur të pedalojnë dhe kjo ka sjellë lulëzim në dyqanet e shitjes së biçikletave dhe pikat ku ato merren me qera.
Kjo është një situatë e ngjashme me atë të vitit 1995 kur greva zgjati një muaj dhe shitja e biçikletave pësoi rritje të madhe.
“Nëse greva vazhdon në Francë, ne do të vazhdojmë të shesim shumë biçikleta”, tha pronari i një dyqani biçikletash për CNN në Francë.
Megjithatë nga kjo situatë po vuajnë shumë biznese të tjera pasi greva ka ndikuar edhe në turizmin e Francës. Gjatë protestave autoritetet u detyruan të mbyllnin kullën Eifel dhe kjo zhgënjeu turistët që kishin vizituar Parisin enkas për të parë simbolin e këtij qyteti.
Sindikatat për mbrojtjen e punëtorëve kanë paralajmëruar se greva do të vazhdojë deri për Krishtlindje. Kryeministri francez, Eduard Filip tha se qeveria e tij do të mbështesë planin e Presidentit Emmanuel Macron për unifikimin e sistemeve të pensionit, që kundërshtohet në masë pasi rrit moshën e daljes në pension dhe ul shpërblimin financiar. /Opinion.al
