Aktivistja suedeze, Greta Thunberg dhe një turmë prej rreth 10.000 protestuesish marshuan në qytetin zviceran të Lozanës para se të shkojnë në Davos, javën e ardhshme, për të kërkuar nga liderët botëror dhe ata të biznesit të bëjnë më shumë për të luftuar krizën klimatike.
Në fillim të javës së ardhshme në Davos të Zvicrës do të zhvillohet ‘Forumi Ekonomik Botëror’.
Forumi organizohet çdo vit, në muajin janar dhe në të marrin pjesë liderë politikë si dhe biznesmen.
17-vjeçarja Thunberg ka nisur pak vite më parë një lëvizje kundër ndryshimeve klimatike dhe tashmë fushata e saj ka marrë përmasa botërore.
“Për udhëheqësit botërorë dhe ata që janë në pushtet, unë do të doja të them se nuk keni parë asgjë akoma”, -tha Thunberg gjatë fjalimit në Lozanë. Kjo është hera e dytë që Thunberg merr pjesë në Forumin e Davosit. Këtë vit, ajo do të jetë pjesë e dy paneleve të diskutimeve.
Mbledhja e këtij viti zhvillohet në një kohë kur zjarret kanë përfshirë pjesë të mëdha të Australisë.
Ndërkohë qeveria australiane ka refuzuar ta ndërlidhë këtë situatë me ndryshimet klimatike, megjithatë është shtuar shqetësimi lidhur me ngrohjen globale./Opinion.al/
