Presidenti Bajram Begaj, gjatë konferencës së përbashkët për shtyp me Presidentin bullgar, është ndalur te çështja e integrimit.
Ai e ka krahasuar veton e Greqisë ndaj Shqipërisë për negociatat me historinë e studentit me pedagogun.
Nga Bullgaria ku ndodhet për vizitë zyrtare, Begaj tha se në të gjitha takimet ndërkombëtare që ka patur, është lavdëruar puna e Shqipërisë në procesin e negociatave me BE-në.
Më tej ai theksoi se çuditërisht ndodhi si puna e studentit me pedagogun që i thotë gjatë gjithë vitit është i shkëlqyer, ke punuar shumë mirë, dhe te nota e fundit e ngel në klasë.
“Në çdo takim ndërkombëtar që kam pasur është vlerësuar jashtëzakonisht shumë Shqipëria për punën që ka bërë dhe është folur jashtëzakonisht shumë për profesionalizmin e treguar nga ekipi shqiptar. Çuditërisht ndodh si puna e studentit që pedagogu i thotë gjatë gjithë vitit është i shkëlqyer, ke punuar shumë mirë, dhe te nota e fundit e ngel në klasë”.
Begaj thotë se procesi i zgjerimit të BE-së me vendet e Ballkanit është investim gjeostrategjik.
“Procesi i zgjerimit është investim gjeostrategjik i BE, ndërsa për ne është jetik dhe strategjik. Është ëndërr për t’u përmbushur. Siguroj se do vazhdojmë të jemi studentë të dalluar, do trokasim në dyert e BE dhe kur të hapet dera besoj se do jemi të lutur të futemi”.
Presidenti Begaj vlerësoi edhe Bullgarinë që ka mbështetur Shqipërisë në këtë proces.
“Bullgaria më së miri e ka bërë këtë, e ka hapur derën, na ka mbështetur. Ne duhet të jemi mirënjohës”.
