Greqia hapi zjarr ndaj një mjeti lundrues që transportonte civilë nga ishulli i Rodosit drejt Egjeut, sikurse bëjnë me dije mediat turke që citojnë Komandën e Rojës Bregdetare. Në një deklaratë komanda njofton se një sirian dhe dy shtetas turq janë plagosur, ndërsa mjeti lundrues u zhyt në ujë si pasojë e sulmit mbi të.
Thuhet se sulmi ndodhi në ujërat greke pranë provincës turke Mugla. Pas sulmit një skuadër emergjence mbërriti në vendgjarje me 4 mjete dhe një njësi zhytëse, ndërsa të plagosurit u çuan në spitalin shtetëror.
Ndërkohë sipas mediave greke mjeti i dyshimtë u sinjalizua të ndalonte por drejtuesi i tij bëri manovra të rrezikshme dhe u qëllua për të neutralizuar.
Tensionet në rajon janë në rritje për shkak të aktiviteteve të eksplorimit dhe nxjerrjes së hidrokarbureve në Mesdhe.
Ndërkohë cnn grek, duke ju referuar burimeve nga marinetraffic.com, thotë se anija turke e kërkimeve detare “Oruc Reis”, e cila është kthyer në objekt të përplasjeve, tashmë ka ndërruar kurs dhe ka bëri një kthim, ndonëse për momentin është e paqartë se për ku është drejtuar. Aktualisht forcat e armatosura greke janë duke ndjekur çdo lëvizje të Ankarasë dhe janë nën alarm.
Më herët, në një postim në tuiter, Ministri turk i Mbrojtjes, shkruante, duke postuar një video: Të frymëzuar nga historia jonë e lavdishme, nga dashuria dhe besimi për vendin, jemi të vendosur dhe të gatshëm të mbrojmë të gjitha të drejtat dhe interest e “Shtëpisë sonë të kaltër”./Opinion.al
