Greqia prej ditësh vijon të përballet me zjarret që kanë përfshirë vendin.
Mediat greke bëjnë me dije se beteja vazhdon me vatrat e reja aktive në frontet në Evros dhe Rodopi. Forcat e Zjarrfikësve janë përqëndruar me 180 zjarrfikës shtesë për frontet e zjarrit në Evros dhe Rodopi. Në total operojnë 474 zjarrfikës me 16 grupe repartesh këmbësorie dhe 100 automjete, ndërsa nga ajri po asistojnë 4 avionë dhe 2 helikopterë.
Në Evros forcat zjarrfikëse po përqendrojnë përpjekjet e tyre në frontin që ndodhet në veriperëndim të zonës së Kotronisë në Evros, ndërsa në Rodopi forcat po bëjnë përpjekje për të ndalur frontin midis zonave Kassitera dhe Kirkis. Shqetësuese raportohet situata në drejtim të jugut për shkak të erërave të forta që kanë përfshirë zonën. Autoritetet kanë paralajmëruar qytetarët që të tregohen të kujdesshëm pasi rreziku ende mbetet shumë i lartë në zonat më të mëdha të vendit.
Vihet re se për ditën e hënë, rreziku i zjarrit mbetet i lartë në shumë zona të vendit. Forcat e shërbimit zjarrfikës të territorit janë në gatishmëri të përgjithshme për të përballuar kërkesat e shtuara të shërbimit që kanë lindur për shkak të numrit të madh të zjarreve, ndërkohë që vijojnë patrullimet e vëzhgimit ajror, si dhe patrullimet nga forcat zjarrfikëse, policore dhe ushtarake.
Ndërkohë nga sot nis dorëzimi i kërkesave për mbështetjen financiare të banorëve të prekur nga zjarret. Njësia Rajonale Evros dha sqarime për procedurën e deklarimit tha se bizneset dhe ekonomitë bujqësore të prekura nga zjarret subvencionohen nga Drejtoria e Ndihmës Shtetërore të Ministrisë së Krizave Klimatike dhe Mbrojtjes Civile./Opinion.al
