Greqia ka refuzuar të nënshkruajë një letër të 27 vendeve anëtare drejtuar Komisionit Europian, që kërkon hapjen e pesë kapitujve të parë të negociatave për Shqipërinë.
Sipas Euractiv, tensionet midis Greqisë dhe Shqipërisë kanë nisur që nga muaji maj, kur kandidati shqiptar etnik grek për kryetar bashkie, Fredi Beleri, i cili kandidon nën flamurin e opozitës, u arrestua dy ditë para zgjedhjeve lokale, si i dyshuar për blerje votash.
Ai fitoi zgjedhjet në Himarë, por nuk ka mundur të betohet si kryebashkiak, për shkak të burgosjes, pavarësisht apeleve të shumta për t’u lejuar të betohet, ose për të përfituar një masë më të butë sigurie.
Athina i ka bërë vazhdimisht thirrje Shqipërisë që ta lejojë atë të bëjë betimin, duke e cilësuar burgosjen e tij si të motivuar politikisht dhe etnikisht. Ndërkaq, qeveria shqiptare ka thënë se nuk mund të ndërhyjë në proceset gjyqësore dhe sistemi i drejtësisë duhet të ndjekë rrugën e tij.
Gjatë fundjavës, u përhapën thashethemet se Athina kishte refuzuar të mbështeste një letër që i kërkonte Komisionit të hapte pesë kapitujt e parë të negociatave. Një burim i Këshillit të BE-së i afërt me këtë çështje konfirmoi për Euractiv se kjo është e vërtetë.
Sipas burimit, Athina thekson disa çështje që i takojnë sundimit të ligjit, si rasti i Belerit, ashtu edhe zbatimi i disa ligjeve që lidhen me pakicën greke të Shqipërisë.
Burimi thekson se pala shqiptare duhet të tregohet “kreative” në zgjidhjen e krizës së krijuar nga çështja Belerit.
Athina zyrtare kërkon që Beleri të lejohet të betohet si kryebashkiak, pasi ky është një vendim administrativ që mund të merret nga Qeveria shqiptare, ndërsa sistemi i drejtësisë merr vendimet e veta në mënyrë të pavarur.
Procedura të tjera si martesat, deklarimet dhe marrëveshjet mund të merren në prani të një noteri apo një zyrtari në ambientet e burgut, ose nëse individi dërgohet në ambientet e institucioneve, nën mbikëqyrjen e policisë.
Ish-presidenti dhe ish-kryeministri Sali Berisha, gjithashtu nën hetim, ka deklaruar se arrestimi dhe gjyqi i Belerit janë inskenuar nga policia dhe gjykata. Ai la të kuptohet se pas këtij rasti është Rama dhe kjo “ka çuar në një përballje me fqinjët tanë”, duke iu referuar marrëdhënieve të tensionuara.
Në një intervistë të fundit kryeministri Rama përsëriti se situata nuk është në dorën e tij dhe ai nuk mund të ndërhyjë kurrsesi.
“Besoj se i kam bërë shpjegimet e mia. Ky nuk është një debat mes Qeverisë së Shqipërisë dhe asaj të Greqisë, sepse ka të bëjë me drejtësinë… është në duart e sistemit të drejtësisë”.
Ai shtoi, “Në fund, çfarëdo që të thonë palët nuk do të zgjidhë problemin që mund ta zgjidhë vetëm rruga e drejtësisë”.
I pyetur nga gazetarja nëse Beleri mund të lejohet të betohet, Rama tha se, “Ka teori të ndryshme për këtë, por thelbi është se kjo do të përcaktohet nga gjykata”, duke shtuar se deri më tani nuk ka një tregues të qartë se si kjo mund të ndodhë.
