Bota

Greqia paralajmëron Turqinë: Ndalo me kërcënimet


Bëhu pjesë e Grupit Zyrtar të Opinion.al
>> KËTU <<
               Publikuar në : 10:47 - 04/09/20 |
el ida

Kryeministri grek, Kyriakos Mitsotakis, tha të premten se Turqia duhet të ndalë kërcënimet, nëse do që dialogu mes vendeve të nisë.

“Kërcënimet duhet të ndalojnë në mënyrë që kontaktet të fillojnë”, tha Mitsotakis.

Ai tha se ministri i Jashtëm grek, Nikos Dendias, do të informojë më vonë, Sekretarin e Përgjithshëm të Kombeve të Bashkuara, Antonio Guterres mbi “veprimtarinë e paligjshme” të Turqisë.

Greqia mohoi të enjten vonë se kishte rënë dakord të zhvillonte bisedime me Turqinë, të ndërmjetësuara nga NATO -ja, për të ulur tensionet mbi kufijtë detarë dhe të drejtat e kërkimit të gazit dhe naftës në rajon.

“Informacioni i botuar që pretendon se Greqia dhe Turqia kanë rënë dakord të mbajnë të ashtuquajturat ‘bisedime teknike’ mbi uljen e tensioneve në Mesdheun lindor nuk kanë të bëjnë aspak me realitetin”, tha ministria e Jashtme e Greqisë.

Shefi i NATO-s, Jens Stoltenberg, më herët kishte thënë se të dy aleatët e NATO-s kishin “rënë dakord të fillojnë bisedime teknike në NATO për të krijuar mekanizma që do të zvogëlonin rrezikun e incidenteve në Mesdheun Lindor”.

Tensionet mes dy vendeve janë rritur pasi Turqia dërgoi anije kërkimore dhe ushtarake në Mesdhe më 10 gusht.

Greqia dhe Qipro thonë se ky veprim ka shkelur sovranitetin e tyre, ndaj Greqia fqinje u përgjigj duke organizuar stërvitje detare me disa aleatë të BE-së dhe Emiratet e Bashkuara Arabe.

Bashkimi Evropian ka kërkuar vazhdimisht nga Turqia të ndalojë aktivitetet e kërkimit duke kërcënuar me vendosje të sanksioneve ndaj Ankarasë nëse ajo nuk pranon të zgjidhë mosmarrëveshjen përmes dialogut.

Mitsotakis tha se Turqia po “dëmton” ligjin ndërkombëtar dhe “rrezikon” sigurinë rajonale duke kërkuar të “ndryshojë” gjeografinë./Opinion.al

Pas