Emigrantëve që jetojnë në kampet e mbipopulluara në ishujt grek, do t’iu ofrohen 2 mijë euro nëse kthehen vullnetarisht në vendet e tyre.
Kjo është një ndihmë financiare për të cilën u ra dakord mes BE dhe Greqisë, dhe ka si qëllim të inkurajojë rreth 5 mijë emigrantë të largohen nga vendi fqinj.
“Ne kemi rënë dakord për një program të përkohshëm të kthimit vullnetar për një periudhë një mujore” tha Ylva Johansson, komisionere për çështjet e brendshme.
Ky program do të shoqërohet nga një pagesë prej 2 mijë eurosh dhe vetëm ata që kanë mbërritur në Greqi para 1 janarit, mund të përzgjidhen.
Shuma është më shumë se pesëfishi i pagës së zakonshme që u ofrohet emigrantëve për t’i ndihmuar ata të rindërtojnë jetën e tyre në vendin e origjinës, nën programet e kthimit vullnetar të drejtuar nga Organizata Ndërkombëtare për Migracionin e Kombeve të Bashkuara (IOM).
Më shumë se 37 mijë persona jetojnë në këto kampe, në pesë ishuj të Greqisë në detin Egje, porta kryesore e azilkërkuesve drejt Evropës që nisen nga brigjet e Turqisë fqinje./Opinion.al
