Mijëra qytetarë grekë të dielën janë derdhur në rrugët kryesore të Athinës për të protestuar kundër “Marrëveshjes së Prespës”, e cila është depozituar në Kuvend dhe nga e hëna pritet të fillojnë diskutimet që do t’i hapin rrugë aprovimit ose refuzimit të saj.
Protesta është shoqëruar me incidente të shumta, pjesa më e madhe e tyre kanë ndodhur në shkallët e Parlamentit, pas ushtarit të Panjohur, ku rreth orës 14:20 minuta, një grup i maskuar hodhi bojë, tymuese, shufra druri dhe gurë mbi punonjësit e policisë.
Nga ana tjetër, policia ka përdorur pompa uji me shkumë në përpjekje për të shpërndarë protestuesit.
Organizatorët e protestës bënë me dije se pjesmarrja e qytetarëve grekë do të ishte më e madhe se kurrë, duke shtuar se asaj do t’i bashkohen edhe personazhe të njohur të artit dhe muzikës greke.
Gjatë marshimeve në rrugët e Athinës, pjesa më e madhe e protestuesve mbanin flamuj dhe hidhinin parulla kundër marrëveshjes.
CNN grek raportoi se duke filluar që nga orët e para të mëngjesit kanë mbërritur në kryeqytet autobus me protestues nga e gjithë Greqia.
Mësohet se rreth tre mijë autobuzë do të mbërrinin në Athinë vetëm nga Greqia veriore, duke kapur një shifër prej 150 mijë deri në 200 mijë protestues.
Policia ka vënë në dispozicion më shumë se 2.000 policë, dronë, helikopterë dhe pompa ujëhedhëse me presion, si dhe ka bërë thirrje për protesta paqësore./Rel.d/
