Pronat e Kishës Ortodokse Autqefale të Shqipërisë kanë rikthyer tensionet dhe përplasjet në distancë mes Ministrisë së Jashtme greke dhe asaj shqiptare.
Fillimisht ka qenë minsitri grek Nikos Kotzias, i cili gjatë një interpelance të thirrur nga deputetit i Demokracisë së Re, Theodoros Karaoglou për pronat e minoritetit grek në Shqipëri ka theksuar se interesi i Greqisë mbetet të pronat e kishës, raporton “TCH”.
“Ministria e Punëve të Jashtme ka monitoruar rregullisht zhvillimet që lidhen me procesin e kthimit të pronës që ishte shpronësuar nga regjimi i Hoxhës në Shqipëri. Sigurisht që është e kuptueshme se interesi ynë është fokusuar veçanërisht në diasporën tonë dhe të drejtat e pronës së Kishës Ortodokse Autoqefale të Shqipërisë”, ka deklaruar Kotzias.
Por Ministria e Jashtme e Shqipërisë ka reaguar duke kritikuar qëndrimet e herëpashershme të Greqisë, sa herë që flitet për Kishën Ortodokse Autoqefale të Shqipërisë.
Zëdhënësi i Ministrisë së Punëve të Jashtme Glevin Dervishi në përgjigje të interesimit të medias mbi deklaratat e Ministrit të Punëve të Jashtme të Greqisë tha:
“Vëmë re sërish me habi se si problemet juridike pronësore në Shqipëri kthehen në pretekst për të përligjur ndërhyrje në çështje krejt të brendshme të Shtetit shqiptar.
Autoqefalia e Kishës ortodokse shqiptare, përveç se frut i mundimeve të panumërta të besimtarëve shqiptarë në breza, është kanonikisht rezultat i qenësisë së një shteti të pavarur dhe sovran shqiptar, në bazë të parimit të kahershëm “Kishë e lirë në Shtet të lirë”.
Këtë autoqefali, të njohur botërisht, të ri konfirmuar në përkatësinë e saj shqiptare nga Shenjtëria e Tij Patriarku Bartolome I-rë, gjatë vizitës së fundit të Kryeministrit Rama në Fanar, e shohim të shpaloset sot lirshëm karshi kishave simotra në Koncilin Panortodoks të Kretës.
Për pasojë, sa herë që Shteti grek mban qëndrime lidhur me Kishën Ortodokse Autoqefale të Shqipërisë dhe ortodoksët në territorin e Shtetit shqiptar, ndërhyn në punët e brendshme të Shtetit shqiptar”.
