Greqia paralizohet edhe sot nga greva e përgjithshme 24-orëshe, që konsiderohet si greva më e madhe kundër qeverisë së majtë të kryeministrit Tsipras që kur ai ka ardhur në pushtet në janar të vitit të kaluar.
Greva është organizuar nga konfederata e sektorit publik që kundërshton projektligjin e ri të sigurimeve sociale që pritet të miratohet gjatë këtij muaji. Në mitingjet e organizuara në vende të ndryshme të kryeqytetit grek dhe qyteteve të tjera të mëdha të Greqisë mijëra pjesëmarrës ngrenë zërin dhe protestojnë për këtë ligj të imponuar edhe nga kreditorët e Greqisë.
Greva mbarëkombëtare përkon me mbërritjen në Athinë të ekspertëve të huadhënësve që po rishikojnë dhe vlerësojnë mbarëvajtjen e programit të ndihmës prej 86 miliardë që do marrë vendi gradualisht në shkëmbim të reformave të ndryshme, midis tyre edhe ajo e pensioneve, sistemi i ri i taksave dhe rishikimi i kredive të këqija.
