Një vrasje makabre ka ndodhur në shtetin fqinj, Greqi. Media vendase bëjnë me dije se krimi, ndodhi në orët e para të mëngjesit kur disa grabitës hynë në një shtëpi në Glyka Nera, Atikë.
Fillimisht, grabitësit kanë vrarë qenin e familjes. Pastaj ata thyen dritaren e katit të parë dhe hynë në shtëpi. Qëllimi i tyre ishte të vidhnin gjërat më me vlerë.
Ata më pas kanë shkuar në dhomën e gjumit, ku ndodhej piloti 32-vjeçar Charalambos Anagnostopoulos. Pasi kanë lidhur 32-vjeçarin, personat e armatosur kanë shkuar në papafingo ku ndodhej 20 vjeçarja dhe vajza e tyre 11 muajshe. Grabitësit kanë torturuar 20-vjeçaren, dhe në fund e kanë vrarë duke e mbytur.
Ndërkohë që pas mobilizimit dhe hetimit të provave në vendngjarje policia në Greqi ka identifikuar vrasësit e 20-vjeçares dhe ka vendosur një shpërblim për këdo që jep informacione rreth tyre.
Raportohet se vendimi për shpërblimin e atyre që kanë informacione rreth vrasësve të nënës së re u nënshkrua sot nga Ministri i Mbrojtjes Civile Michalis Chrysochoidis dhe Zëvendës Ministri i Financave Theodoros Skylakakis.
Njoftimi autoriteteve greke: “Me Vendimin e Përbashkët Ministror të sotëm të Ministrit të Mbrojtjes Civile, Michalis Chrysochoidis dhe Zëvendës Ministrit të Financave, Theodoros Skylakakis, u shpall një shpërblim monetar prej 300,000 € për ata që kanë informacione që mund të çojnë në arrestimin e autorëve të grabitjes dhe vrasjes së 20-vjeçares më 11 maj.”/Opinion.al
