Parlamenti grek ka votuar një paketë dispozitash të reja, duke zgjeruar gamën e emigrantëve që mund të përfitojnë nënshtetësinë greke. Kjo e drejtë tashmë u ofrohet edhe emigrantëve me moshë mbi 65 vjeç, të sëmurëve mendorë apo psikikë, si dhe invalidëve. Një nga masat favorizuese është ajo për uljen e tarifës që paguhet për aplikimin.
Nga 700 euro, bëhet tashmë 550 euro. Gjithsesi, kjo është një tarifë mjaft e shtrenjtë, sidomos për kushtet e Greqisë. Këtë e pranojnë edhe hartuesit e draftit. Dispozitat përcaktojnë rregulla të reja për kryerjen e testit të gjuhës dhe njohurive për historinë dhe kulturën e vendit.
Fatos Malaj, një emër i njohur në radhët e emigrantëve si dhe kreu i shoqatës Arogi (Përkrahja) në shtetin helen ka treguar disa detaje. Sipas tij ligji i ri nuk zgjidh në thelb asnjë nga problemet reale të gjithë procedurës.
“Përkundrazi, zëvendësimi i intervistës para komisionit me një test të bazuar në pyetje të paracaktuara; ndërprerja e procedurës së regjistrimit të aplikantëve, të cilët ndërkohë janë transferuar jashtë shtetit si dhe testet e certifikimit të gjuhës greke, jo vetëm që përjashtojnë një numër të madh të huajsh- pasi parashikohen aftësi që nuk disponon as një numër i madh i shtetasve grekë- por paralelisht krijojnë një peshë administrative të jashtëzakonshme, e cila pa përforcimin e shërbimeve përkatëse për të huajt, ngadalëson akoma më tepër procesin e miratimit të nënshtetësisë”, thotë ai.
Malaj thekson se vonesat në procedurën e nënshtetësisë greke përbëjnë kulmin e politikës tepër problematike për emigracionin. Në fakt, deri më tani, nënshtetësinë greke e përfitonin fëmijët e lindur apo të arsimuar në Greqi, qytetarët me origjinë greke dhe një numër mjaft i vogël shtetasish nga vende të treta.
Sipas të dhënave zyrtare, janë rreth 230.000 qytetarë të huaj që kanë marrë nënshtetësinë greke në gjashtë vitet e fundit. Shumica dërrmuese e tyre janë emigrantë të ardhur nga Shqipëria./Opinion.al
