Një pacient shqiptar ka goditur me thikë një infermiere greke në spitalin Attikon në Athinë. Mësohet se 59-vjeçari ishte i shtruar në spital pasi iu nënshtrua një operacioni një javë më parë.
Mëngjesin e sotëm, ai i kishte rënë ziles duke kërkuar ndihmën e infermieres, ndërkohë që me një thikë kuzhine në dorë e priste pas derës së dhomës.
Sapo kjo e fundit hyri brenda, ai e goditi disa herë duke i shkaktuar plagë të shumta. Më pas, shqiptari u ngjit në katin e 5 të godinës së spitalit dhe u hodh nga lartësia duke u vetëvrarë.
Ndërsa, infermierja 32-vjeçare, e martuar dhe nënë e dy fëmijëve, po merr ndihmë mjekësore. Ajo ka plagë në gjoks, kokë dhe shpinë. Gjendja e saj është e rëndë, por mjekët thonë se nuk është në rrezik për jetën.
Shkaqet e kësaj ngjarje të rëndë nuk dihen, por dyshohet se shqiptari, identiteti i të cilit nuk është bërë i ditur, vuante nga probleme të shëndetit mendor./ Opinion.al
