Një makinë me targa shqiptare ka rezultuar e djegur nga zjarret që kanë përfshirë Greqinë. Mjeti është me targa të Tepelenës, por nuk dihet numri I targës dhe fakti nëse brenda tij ka patur njerëz. Si pasopjë e zjarreve që kanë prekur pyjet greke dhe më pas janë përhapur për shkak të erës, deri tani kanë humbur jetën 50 persona mes të cilëve edhe një foshnjë 6 muajsh dhe janë djegur rreth 300 automjete. 156 persona, mes të cilëve 16 fëmijë janë plagosur dhe ndodhen në spital. Në vend janë dërguar ndihma nga Franca dhe Polonia
Veçanërisht zjarri ka goditur zonën e Atikas dhe plazhin Mati 18 milje në lindje të Athinës, ndërkohë që vendi është duke jetuar një situatë edhe më të vështirë se ajo e evakuimit nga Peleponezi në gusht të vitit 2007, ku humbën jetën dhjetëra njerëz.
“Mati nuk ekziston më si vendndodhje. Shihja njerëz që digjeshin jashtë makinave. Jam me fat që jam gjallë”, tha një grua për Skai TV.
Njerëzit janë hedhur në det, ndërkohë që flakët i janë afruar bregut. Qindra prej tyre janë shpëtuar nga varkat e shpëtimit, ndërkohë që të tjera janë bllokuar nga flakët dhe tymi.
Nikos Economopoulos, kreu i Kryqit të Kuq Grek, ka treguar për Skai TV: “Një nga punonjësit e gruopit të shpëtimit më tregoi I shokuar se kishte parë 26 persona të shtrënguar pas njëri-tjetrit në një fushë vetëm 30 metër larg bregut.
Ndërkohë që një dëshmitar kishte parë disa trupa të shpërndarë në zonë.
Kryeministri Tsipras ka shpallur gjendjen e emergjencës për zonën e Atikas dhe ka anuluar një udhëtim jashtë vendit.
Imazhet tronditëse të postuara nga qytetarët e zakonshëm që largoheshin nga resorti i Matit në Lindjen e Attikës, që u godit nga zjarret po bejne xhiron e mediave sociale. Fotot tregojnë njerëz të lodhur që mezi mbahen në këmbë në breg në mes të tymit duke pritur që të shpëtohen nga anijet e marinës të vendosura nga Ministria e Mbrojtjes Greke për të ndihmuar në përpjekjet për evakuim. / Opinion.al
