Vrasja e nënës 20-vjeçare Karolina në Greqi tronditi të gjithë opinionin public teksa nga autoritetet e policisë ende nuk ka emra të grabitësve që u futën brenda banesës së saj.
Mediat greke raportojnë sot se hetuesit grekë janë fokusuar tek burgjet e vendit, dhe kryesisht duke kërkuar informacion për të dënuarit që kanë përfunduar dënimet dhe kanë dalë nga qelia së fundmi. Bëhet me dije se policia greke është duke kërkuar për ata të burgosur që kanë qenë të dënuar për grabitje, vrasje, grabitje me dhunë apo grabitje me pasojë vrasjen.
Mediat greke, duke iu referuar burimeve policore, raportojnë se mënyra si veprojnë grupet gjeorgjiane është e ashpër dhe mizore, dhe kjo I ka shtyrë autoritetet të jenë më të fokusuar në këto grupe. Për këtë arsye ka dyshime që grabitja e parave në banesën e 20-vjeçares Karolina, që përfundoi me vrasjen e kësaj të fundit, të jetë kryer nga gjeorgjianë.
Por të marrësh informacione për mafian gjeorgjiane, sipas shtypit grek, nuk do të jetë e lehtë pasi anëtarët e kësaj bande udhëhiqen nga fshehtësia dhe besnikëria mes njëri-tjetrit.
Nga ana tjetër bëhet me dije se edhe pse autorët morën paratë, hetuesit grekë nuk arrijnë të kuptojnë përse grabitja duhet të përfundonte me vrasje. Për këtë arsye, të gjitha pistat hetimore janë të hapura.Ndërkohë që policia ka ofruar një shumë të lartë parash si shpërblim për këdo që mund të ketë të dhëna për autorët./Opinion.al
