Alexis Tsipras ka dhënë dorëheqjen nga drejtimi i partisë Syriza në Greqi, pas rezultatit që partia e tij arriti të marrë në raundin e dytë të zgjedhjeve parlamentare të mbajtuar të dielën e kaluar.
Në një deklaratë të publikuar në mediat greke ai bëri me dije se se nuk do të kandidojë sërish për të qenë kryetar dhe se do të propozojë një lidership të ri në krye të partisë.
“Kam vendosur të propozoj zgjedhjen e një lidershipi të ri nga anëtarët e partisë me rekurs të drejtpërdrejtë në procedurat në të cilat nuk do të jem kandidat. Është e nevojshme të gjendet një SYRIZA e re që do t’i përgjigjet sfidave dhe pritshmërive të atyre që ka vendosur të përfaqësojë”, tha Alexis Tsipras.
Ai tha se Syriza u bë partia e parë në Evropë që qeverisi në kushte shumë të vështira.
Kryeministri Kyriakos Mitsotakis arriti të sigurojë fitoren në raundin e dytë të zgjedhjeve në Greqi, duke marrë mazhorancë absolute që i dha mundësinë të krijojë i vetëm qeverinë.
Pas numërimit të votave, 40% e tyre shkuan për partinë konservatore “Demokracia e Re”, 17.8% për Syriza, 12.23% të votave i mori PASOK, ndërsa partia “Spartanët”, e drejtuar nga një prej anëtarëve të Agimit të Artë arriti të hyjë në Parlament./Opinion.al
