Një shqiptar ka tentuar të vrasë me thikë kunatën e tij, duke e goditur barbarisht disa herë. Mediat greke raportojnë se ngjarja ka ndodhur në një lokal në ishullin e Kretës në Greqi, ndërsa kanë publikuar edhe pamje nga ngjarja.
Sipas tyre shqiptari i identifikuar si Ilo Senja është dorëzuar në polici 24 orë pas aktit të rëndë, ndërsa kunata e tij ka mbetur e plagosur dhe ndodhet në spital në rrezik për jetën.
Gruaja 50-vjeçare punonte si sanitare në një lokal në Greqi. Ajo ishte në vendin e punës në momentin që Ilo Senja u fut dhe e goditi disa here në këmbë dhe në gjoks.
Nisur nga hetimet e para dhe dëshmive, dyshohet se shqiptari ka pasur probleme me bashkëshorten dhe kjo e fundit ishte larguar nga shtëpia bashkë me fëmijët për të jetuar te motra e saj. Mediat greke shkruajnë se 46-vjeçari e ka pyetur kunatën e tij se ku ndodhej bashkëshortja dhe më pas e ka masakruar me thikë duke tmerruar edhe pushuesit që ndodheshin aty.
