Richard Grenell, i Dërguari i Presidentit Amerikan, Donald Trump për Misione Speciale ku bën pjesë edhe Ballkani Perëndimor është përfshirë serish në replika të ashpra me Kryeministrin e Kosovës, Albin Kurti.
Ai ka reaguar ndaj një deklarate të Kurtit gjatë një interviste në mediat lokale se marrëdhëniet e Kosovës me SHBA janë më të forta se kurrë.
“Nuk kanë qenë më të forta se tani. Kemi investimet më të mëdha amerikane”, u shpreh Albin Kurti.
Por Grenell thotë se marrëdhëniet mes dy vendeve s’kanë qenë kurrë më të dobëta sesa tani.
“Zhgënjyese. Marrëdhëniet nuk kanë qenë kurrë më të ulëta. Albin Kurti është dënuar nga administrata e parë Trump, administrata e Bidenit, NATO, BE, Ambasada e SHBA-së, Anthony Blinken etj”, deklaroi Grenell.
Pak ditë më parë, Richard Grenell publikoi një koment të gjatë në rrjetin social “X”, ku u bënte thirrje qytetarëve të mos mashtrohen nga deklaratat e Kurtit pasi sipas tij kreu i Vetëvendosjes nuk është një partner i besueshëm i SHBA-ve.
Kjo deklaratë u shpërnda edhe nga djali i Trump, Donald Trump Jr. Gjatë 4 viteve në pushtet, Kryeministri i Kosovës u përfshi disa herë në përplasje me Ambasadën Amerikane në Prishtinë për disa operacione të zhvilluara në veri, të cilat SHBA i konsideroi të pakoordinuara me partnerët.
