I dërguari i Shtëpisë së Bardhë për dialogun Kosovë-Serbi, Richard Grenell, i bëri thirrje Qeverisë së re të Kosovës që të heqë taksën ndaj mallrave të importuara nga Serbia.
Grenell tha se pret që “taksa të hiqet menjëherë”.
“Ua kemi bërë të qartë të gjithë udhëheqësve të partive se heqja e taksës është në interesin më të mirë të Kosovës dhe ekonomisë së këtij vendi”, tha Grenell në një deklaratë me shkrim për agjencinë e lajmeve Associated Press.
Në fund të vitit 2018, Qeveria e Kosovës, me në krye Ramush Haradinajn, u vendosi taksë 100% importeve nga Serbia dhe Bosnje e Hercegovina. Kjo ndërpreu dialogun për normalizimin e marrëdhënieve midis Kosovës dhe Serbisë.
Kryeministri i ri i Kosovës, Albin Kurti, ka thënë më herët se është i gatshëm për vazhdimin e dialogur me Serbinë dhe ka paralajmëruar formimin e një ekipi gjithëpërfshirës për këtë proces.
Kurti po ashtu ka thënë se është i gatshëm të ndërmarrë masa reciproke tregtare, ekonomike dhe politike ndaj Serbisë./Opinion.al
