Shtimi i të infektuarve me koronavirus në vendin tone kohët e fundit nuk lënë mënjanë as kategori specifike siç janë gratë shtatzëna. Mjeku obsteter-gjinekolog Redi Hoxhallari pranë maternitetit “Koço Gliozheni” shprehet se ka patur raste të grave shtatzëna që kanë rezultuar të infektuara.
“Edhe tek gratë shtatzëna Covidi mund të shfaqet në aspektin klinik dhe në forma të ndryshme. Nga format e lehta, pra që kalojnë si një virozë normale dhe deri në format e tjera të mesme, apo të komplikuara. Në strukturën tonë spitalore kemi zona të dedikuara për pacientet me Covid. Në maternitet ka raste me Covid. Ne mundohemi të bëjmë zgjidhjen e lindjes në rastet kur sëmundja presiston për një kohë të gjatë në mënyrë të tillë që të shmangim dhe problematikat që mund të ndikojnë tek bebi”, është shprehur mjeku obsteter-gjinekologu Redi Hoxhallari.
Ashtu sikurse në shumë vende të botës, specialistët rekomandojnë që edhe gratë shtatzëna në vendin tone të marrin vaksinën anti-covid që të jenë sa më të mbrojtura ndaj virusit.
“Të vaksinohen, sepse e dimë të gjithë që është një sëmundje që ka fatalitete, është sëmundje që kalon me shumë vështirësi, rëndesë. Janë shumë arsye e faktorë që na bëjnë ne të theksojmë rëndësinë e vaksinimit edhe të nënave shtatzënë. Raste të grave shtatzëna të vaksinuara ne kemi, Pfizer është vaksina e zgjedhur për gratë shtatzëna, por dhe vaksinat e tjera nuk është se duket të kenë efekte negative tek fetusi”, është shprehur ai.
Mjekët bëjnë apel që gratë e kësaj kategorie nuk duhet të neglizhojnë asnjë simptomë të ngjashme me koronavirusin dhe duhet të konsultohen me specialistin./ Klan News
