Nga Suada Daci
Blerim Destani tregon në këtë intervistë për Opionin.Al të rejat më të fundit nga karriera e tij artistike si dhe nga ajo private, për të cilën ka gjithnjë interes…
Pas “Alarm Fur Cobra”, do të shohim në një tjetër film “Soko 5113”, përsëri aksion?
Fjala është për serialin policesk “SOKO 5113” ku isha pjesëmarrës në një nga episodet e serialit. Ndërsa tani në këtë fundvit pritet premiera e filmit gjerman “Frauen”, që në fakt është komedia e parë në të cilën kam luajtur.
Cili është roli juaj në këtë film?
Nuk dua që të flas për përmbajtjen e filmit, por ajo që mund të them është se në film janë tre burra që vuajnë pasojat e lidhjeve të tyre me gratë. Ashtu siç edhe është titulli i filmit “Frauen” (Gratë). Personazhet kalojnë nëpër shumë situata komike duke u munduar që të largohen sa më larg grave që u kanë shkaktuar vuajtje, por në të njëjtën kohë pa e diktuar afrohen më shumë e më shumë drejt tyre. Pra është një komedi tipike gjermane, dhe shpresoj që të pëlqehet jo vetëm në Gjermani.
Si ka qenë ky vit për ty edhe pse jemi pak herët për bilance?
Në përgjithësi jam shumë i kënaqur, pasi në këtë vit unë isha pjesëmarrës në disa projekte filmike, në veçanti në Gjermani. Ajo që më bën të lumtur është vazhdimësia e bashkëpunimit me disa regjisor siç janë: Nikolai Müllerschön dhe Nico Zavelberg. Ky bashkëpunim kuptohet që do vazhdoj edhe në vitet në vazhdim, pasi që tani kam ofertat dhe parakontratat e nënshkruara.
Vazhdon të mbetesh një mashkull shumë i kuruar. Kujdesesh vet për look-un?
Mundohem me aq sa më lejon koha që të kujdesem për look-un, pasi në shumicën e kohës jam i angazhuar. Kjo do të thotë se në shumë raste angazhimet më diktojnë edhe look-un, pasi para çdo projekti të ri unë mundohem që të jem sa më afër personazhit edhe me paraqitjen time.
Natyra, dashuria për kafshët, shëtitjet shohim që i ke si antistres. Me thuaj pak si quhen qenushët e tu?
Jeta është shumë dinamike dhe njeriu duhet të gjej edhe mënyrën se si duhet të rimbush bateritë. Këto që përmendët janë disa nga mënyrat më të mira për një gjë të tillë. Fjala është për qen të racës specifike të trojeve tona, më saktë për qen të Sharrit siç i quajmë ne zakonisht. Kuptohet që kanë emrat e tyre specifik, por nuk dua t’i përmend publikisht, pasi edhe vet emrat e tyre janë një lidhje emocionale që kam me ta.
Statusi vazhdon të mbetet ende “single”, apo kemi të reja nga jeta sentimentale…
Hëm! Kur më bëhet kjo pyetje, më kujtohet Gjyshi im i cili me shumë humor thoshte se Burri përherë i ka përgjigje në dy pyetje që i parashtrohen. Në pyetjen; ku je? Përgjigjet; Aty ku e kam punën! Ndërsa në pyetjen; Prej nga je? Përgjigjet; Prej andej nga e kam gruan! Pra, nëse i referohem kësaj barsolete të Gjyshit, unë ende kam përgjigje vetëm në pyetjen e parë, pra jam aty ku e kam punën, ndërsa për pyetjen e dytë ende nuk e di, dhe kjo është edhe bukuria e jetës, pasi ende pres se ç’ka do të më ofroj jeta që kam përpara.
Emri juaj u përfol se do të ishit pjesë e programit “I can do that” në Top- Channel, do të merrni pjesë në këtë projekt?
Nuk do të marrë pjesë në programin e cekur nga ju.
Kur do të kemi përsëri në Shqipëri….
Shpresoj së shpejti, pasi kam disa oferta nga Shqipëria që jam duke i shqyrtuar me shumë interes.
