Kryetari i parlamentit Gramoz Ruçi ka deklaruar sot se sjellja e opozitës gjatë votimit për Kryeprokuroren ka qenë e paprecendent. Ai tha se “kam 27 vite deputet dhe skena e së hënës nuk ka ndodhur kurrë!” Po kështu ai e vlerësoi të ligjshëm votimin edhe pse pati konfuzion me kartat elektronike të votimit.
Deklarata u bë gjatë një konference të përbashkët me kryetarin e parlamentit të Maqedonisë Telat Xhaferri i cili po viziton sot Shqipërinë.
A keni patur kërkesë për të dënuar deputetet e opozitës që shkaktuan trazira gjatë seancës për Kryeprokuroren?
Ruçi: Po kam patur kërkesë informale nga deputetë të mazhorancës. Sapo ajo të më vijë me shkrim do merren masa konform rregullores.
A keni një vlerësim për atë që ndodhi. A është i vlefshëm votimi, pasi kishte edhe vota në opozitës?
Ruçi: Kam një vlerësim…Unë kam 27 vjet deputet në këtë parlament. Kam qenë edhe në opozitë edhe në mazhorancë. Në parlament kanë ndodhur 3 gjëra që nuk kanë ndodhur kurrë më parë: Asnjë opoztë nuk ka i është kundërvënë policisë për të uzurpuar parlamentin. Nuk ka ndodhur që parlamentarët të përdorin dhunë dhe mjete te forta, si këpucë deri në kabinetin qeveritar. Në asnjë rast nuk ka ndodhur ushtrim dhune për të privuar të drejtat e votës, siç ndodhi me kartat elektronike ku deputetët u ndaluan të ushtrojnë detyrën e tyre për të mos votuar.
Për sa i përket votave të mazhorancës: Në parlament gjatë prezencës kanë qenë 76 deputetë. Në votim morën pjesë 73 deputetë. Nuk kanë votuar 3 deputetë. Në dijeninë time u është ndaluar e drejta e votës kryetarit të komisionit të ligjeve dhe kryetares së komisionit të sigurisë. A është normale që këta deputetë që ishin firmëtarë për Kryeprokuroren të mos votojnë? Edhe një deputet tjetër i tretë nuk është lejuar të votojë. Ndërsa nga 69 votat, dy vota janë të deputeteve të PS, por që kanë votuar me kartat e kolegeve të PD pasi iu grabitën kartat e tyre. Ata kanë bërë kërkesë që t’ju njihet vota. Unë gjykoj se votimi është normal. Për kryeprokuroren duhet të ishin 72 vota pro. Pra 69 plus dy vota të deklaruara të deputetëve që nuk patën mundësi të votojnë.
/Opinion.al
