Kreu i Grupit parlamentar të PS-së, Gramoz Ruçi ka deklaruar sot se vendi është në prag të një krize politike që do të prodhojë destabilitet.
Nga Fieri ku ndodhej në një aktivitet të ALUIZNI-t për të shpërndarë tapi, ai tha se PD-ja po përpiqet ta zhysë vendin në krizë. “Çadra kërkon të mos ketë as rizgjedhje të Presidentit dhe as zgjedhje, çka e lë vendin pa institucionet themelore dhe sjell krizë”, u shpreh Ruçi.
Ai komentoi deklaratën e mbrëmshme të Bashës në Opinion i cili tha se zgjedhjet mund të shtyhen. “U hodh mbrëmë nga çadra teza që të mos ketë zgjedhje, kjo domethënë që në shtator t’i mbarojë mandati parlamentit aktual. Kjo do të thotë që Shqipëria të ngelet pa parlament, pa qeveri dhe kjo është kriza. Kjo që po ndodh tani është përpjekje për destabilitet. Ne e kemi provuar destabilitetin në vitin 1997, në kohën e piramidave etj. Pushtetin ta jep elektorati. Është koha që të votojmë për zgjedhjen më të mire dhe jo sipas oreksit të partive”, deklaroi Ruçi.
