Bankat kanë rënë pre e grabitjeve në mënyrë të vazhdueshme gjatë vitit 2016, dhe rasti i fundit ka pak javë që ka ndodhur në mes të Bllokut në Tiranë.
Për të parandaluar grabitjet, policia thotë se bankat duhet të forcojnë masat. Por duke qenëse nuk i detyronte dot ato, uniformat blu shohin si domosdoshmëri miratimin e projektligjit për masat shtesë të sigurisë publike.
“Sot, këto subjekte nuk detyrohen me ligj, por edhe nuk mbajnë përgjegjësi me ligj. Të marrim masa të qarta sigurie dhe të kemi një rregull të qartë, që ky proces do të përcaktohet në këtë formë sepse përcaktohet nga akte ligjore dhe nënligjore. Kjo është pengesa kryesore. Nëpërmjet këtij ligji ne i japim detyrime subjektit, që të marrë masa shtesë që në momentin fillestar të ndërtimit të objektit”, shprehet Dimitraq Ziu, zëvendësdrejtor i Policisë së Tiranës në një prononcim për TCH.
Policia ka propozuar edhe forcimin e masave për mjetet e transportit të vlerave monetare, që disa herë kanë rënë pre e grabitjeve.
“Nuk mund të jetë një mjet që transporton miliona euro i barabartë me një mjet që transporton një vlerë monetare shumë më të ulët. Të vendoset GPS, që është lehtësisht i arritshëm, të vendoset për të pasur një kod në kasafortë, siç e kanë edhe vendet më të përparuara”, thotë Ziu.
Përveç superbrabitjes së Rinasit, gjatë 2 muajve të fundit një bankë u vodh në Tiranë dhe një tjetër u grabit në qytetin e Vlorës.
