Një ditë pas grabitjes spektakolare në Rrugën Tiranë-Rinas pranë Qafë Kasharit, zv.drejtori i Policisë së Shtetit ka dalë në një deklaratë për mediat ku ka folur për shkeljen e policisë private që shoqëronte paratë e BKT. Sipas policisë, faji është është “Jaguar Security” por edhe i BKT-së e cila edhe sot tentoi të transferonte para, sipas Qatos, në mënyrë të pasigurt. Qato ka dhënë vetëm një fjali për pistat e hetimit apo nëse ka ndonjë të dhënë për autorët. Deklarata e tij ishte e gjitha e orientuar tek pasiguria e policive private.
Më poshtë deklarata e Altin Qatos
Siç jeni vënë në dijeni, dje në datën 09.02.2017, rreth orës 13:15, pranë një kryqëzimi, në rrugen Qafë Kashar-Rinas Tiranë, para Universitetit “Epoka”, ka ndodhur vjedhja me armë e një sasie vlerash monetare të Bankës Kombëtare Tregtare, që transportoheshin për në Rinas nga Shoqëria Private e Sigurisë Fizike “Jaguar”.
Çështja është në hetim dhe po ndiqet me përparësi të lartë nga Policia e Shtetit në bashkëpunim me Prokurorinë për Krimet e Rënda.
Përveç punës që po bëhet për zbulimin e autorëve, policia ka ngritur grupet e punës, për të analizuar përgjegjësinë e strukturave përkatëse lidhur me sigurinë e transportit të vlerave monetare.
2. Përgjegjësitë e SHPSF, Bankave.
Nga analiza paraprake e ngjarjes rezulton se subjekti Shoqëria Private e Sigurisë Fizike “Jaguar”, i cili ka kontratë shërbimi për shoqërimin e vlerave monetare me BKT me nr.813, datë 01.05.2015 me afat dy vjeçar, ka shkelur rregullat e mëposhtme:
1. Mjetet për transportimin e vlerave monetare ishin të modifikuara dhe nuk plotësonin kriteret, pavarësisht se në lejen e qarkullimit të lëshuara nga Drejtoria Rajonale e Shërbimit të Transportit Rrugor janë shënuar “automjet i prodhimit të veçantë”.
2. Kamerat e instaluara në mjetin e blinduar nuk ishin të aktivizuara në momentin e ndodhjes së ngjarjes.
3. Njëri nga drejtuesit e mjetit të blinduar nuk kishte autorizim për të qarkulluar me këtë mjet.
4. Punonjësit e shërbimit ishin të pajisur me armë zjarri, por nuk kanë reaguar në përputhje me ligjin “Për përdorimin e armëve”.
5. Mjetet e gjurmimit nuk ishin vendosur sipas procedurave standarde për shoqërimin e vlerave monetare.
6. Të dy automjetet e shoqërimit të vlerave monetare nuk kishin logon dhe stemën e Shoqërisë Private të Sigurisë Fizike.
7. Punonjësit e shërbimit të eskortës nuk kanë njoftuar strukturat e Policisë së Shtetit, dhe nuk kanë bashkëpunuar me to në momentin e ndodhjes së ngjarjes sipas procedurave standarte.
8. Qendra e kontrollit të SHPSF “JAGUAR” nuk funksionoi për menaxhimin e këtij shërbimi.
Bazuar në shkeljet e kryera, Komisioni i Shqyrtimit të Kërkesave për Licencim dhe Çertifikim, në Drejtorinë e Përgjithshme për Sigurinë Publike, gjatë paradites së sotme, ka vendosur “heqjen e çertifikatës të titullarit dhe drejtuesit teknik i subjektit të SHPSF “Jaguar” shpk, nënkategorisë 1.3.B, me seli ne Tiranë.
Sot në datën 10 Shkurt 2017, megjithë ngjarjen e ndodhur dje, përsëri BKT ka shoqëruar vlera monetare me shoqërinë SHPSF “Jaguar”, e cila nuk plotëson kriteret dhe i është hequr çertifikata. Policia e Shtetit, menjëhere ka marrë masa për bllokimin e kësaj eskorte dhe kthimin përsëri të Bankë.
Me miratimin dhe hyrjen ne fuqi edhe të ligjit “Për masat shtesë të sigurisë”, Bankat dhe SHPSF-të duhet t’i përgjigjen detyrimeve të përcaktuara në ligj dhe aktet normative në zbatim të tij.
Policia e Shtetit në bashkëpunim me Bankën e Shqipërisë, Shoqatën e Bankave, po punojnë për përmirësimin e kuadrit ligjor ekzistues, në lidhje me sigurimin e objekteve bankare, kategorizimin e niveleve të mjeteve të blinduara, trajnimin e personelit të shërbimit SHPSF dhe detyrat dhe përgjegjësitë e gjithë subjekteve të përfshira.
Me Urdhër të Drejtorit të Policisë së Shtetit është ngritur një grup pune, me qëllim inspektimin dhe kontrollin e veprimtarisë së gjithë SHPSF-ve që veprojnë në Republikën e Shqipërisë. Për ato shoqëri që do të kenë mangësi dhe shkelje, do të propozohet heqja e licenses së tyre.
Policia e Shtetit po vazhdon hetimet intensive për zbardhjen e kësaj ngjarjeje me qëllim nxjerrjen e përgjegjësive dhe autorëve para ligjit.
