Ende mbeten mister autorët e grabitjes së ndodhur më 9 prilli në aeroportin e Rinasit.
Grupi hetimor dhe prokurorët nga hetimet e deritanishme, kanë arritur në konkluzioni se automjeti që u përdor ditën e grabitjes me mbishkrimin “Hetimi Tatimor”, është modifikuar në qytetin e Elbasanit.
Sipas “Top Channel”, automjeti i grabitësve është modifikuar në një pikë servisi që ndodhet në një lagje shumë të njohur në Elbasan. Lidhur me këto dyshime autoritet kanë marrë në pyetje një person nga qyteti i Elbasanit, në mënyrë që të rrëfej se kush ishin personat që kërkuan modifikimin e automjetit.
Për shkak të procesit hetimor, lidhur me personin që është marrë në pyetje nuk ka të dhëna konkrete.
Po ashtu, një tjetër person është nën hetim dhe është kushëriri i një prej emrave më të kërkuar në Shqipëri dhe jashtë vendit.
Prokuroria e Krimeve të Rënda thotë në rrugë jo zyrtare, se ka përfunduar sekuestrimin e dhjetëra dokumenteve pranë TIA-s dhe ICTS-së dhe pritet që në javën në vazhdim të nisë marrjen në pyetje të shumë prej këtyre punonjësve.
Në grabitjen e 9 prillit mbeti i vrarë një nga autorët e grabitjes, Admir Murataj, një personazh i akuzuar për një seri grabitjesh në Shqipëri dhe jashtë saj. Deri më tani autoritetet nuk kanë dhënë më shumë detaje në lidhje me identifikimin e autorëve të tjerë për shkak të sekretit hetimor./ Opinion.al E.Xh
