Prokurorët që kanë në dorë grabitjen e fundit në Rinas po hetojnë dhe për rrjedhje informacioni, si nga ana e bankave ashtu dhe nga punonjës apo ish-punonjës të kompanisë koncesionare që merret me sigurinë e aeroportit.
Dhe në këtë linjë qëndron dhe deputeti i Partisë Socialiste, Paulin Stërkaj. Sipas tij, edhe një person i pa inkriminuar më parë, duke parë sigurinë e dobët të aeroportit dhe sasinë e madhe të parave, mund të tentojë ta realizojë një vjedhje të tillë.
“Ato janë gjëra në hetim dhe asnjëri nga ne nuk është i njohur se çfarë po bëjnë në hetim të kësaj çështjeje. Unë si deputet, si ish-oficer policie do kisha hetuar në thelb të kësaj gjëje. E kam thënë dhe në disa media të tjera. Këto vjedhje janë në bashkëpunim. Dhe unë e theksoj se kush e di kur lëvizin këto miliona euro drejt Rinasit? Nga kush rrjedh informacioni? Nëse bëhet fjalë për 10 milionë euro mund të ketë njerëz që s’kanë bërë asnjë krim në jetën e vet, por duke e dit që në Rinas te avioni s’ka as armë, as policë, kurrkush me i kap, kam bindjen që edhe ata mund të tentojnë me rreziku”, tha Stërkaj.
Për sa i përket përgjegjësisë, Stërkaj renditi dy arsye; koncesionarin dhe rrjedhjen e informacionit në bankat që bëjnë këto lëvizje transfertash.
“Për mua përgjegjësia shkon në disa pozicione. Për mua kontrata koncensionare i ka dhënë prioritet. Këto kontratat koncesionare i kanë dhënë prioritet koncensionarit dhe vendos ai. Mirëpo u bë e disata herë që bëhet. Mirëpo fajin e kësaj pune unë ua lë bankave. Që rrjedhin informacione në banka dhe shkojnë në grupet kriminale. Ai është shkaku”, thotë deputeti.
Zyrtarisht Prokuroria ka regjistruar procedimin për akuzat e grabitjes së bankave, vrasje të punonjësit të policisë e mbetur në tentativë, grup të strukturuar kriminal dhe armëmbajtje pa leje.
Prokurorët në ditët në vijim do të fillojnë marrjen në pyetje të zyrtarëve të aeroportit dhe institucioneve shtetërore të cilat kanë pasur detyrë të sigurojnë perimetrin e Aeroportit të Rinasit./Opinion.al
