Janë zbuluar detaje të tjera të grabitjes të mbi 1.5 mln eurove të BKT-së që po dërgoheshin në Rinas për t’u depozituar në Vjenë.
Kështu, burime brenda organit të hetimit, thonë për “Panoramën” se para se të ndodhte grabitja e parave të BKT-së, në të njëjtën rrugë kanë kaluar edhe paratë e dy bankave të tjera të nivelit të dytë.
Por si duket, grabitësit kanë qenë të organizuar për të grabitur paratë e BKT-së. Kjo përforcon dyshimet se grabitësit ishin përgatitur dhe kishin informacion vetëm për paratë e BKT-së.
Është mësuar se vetëm pak minuta para se paratë e BKT-së të kalonin në aksin ku ndodhi grabitja, kishin kaluar paratë e dy bankave të tjera.
