Policia ka mundur të sekuestroje një mjet furgon tip “Ford” ngjyrë të bardhë, i cili dyshohet se është përdorur nga autorët e grabitjen më 30 qershor në pistën e avionëve në Rinas. “News 24” ka siguruar foton e këtij mjeti i cili qëndron i sekuestruar në drejtorinë e policisë tiranë.
Gjetja e kësaj prove që lidhet me grabitjen spektakolare, pritej te sillte të dhëna të vlefshme hetimore, por kjo nuk ka ndodhur sepse lëvizja e mjetit menjëherë pas kostatimit nga efektivët ka prishur prova të rëndësishme. Burime nga policia thonë për “News 24”, se mjeti është gjetur në mbikalimin, i cili po ndërtohet të Pallati me Shigjeta.
Mjeti u gjet i ndaluar dhe me dritat e pozicionimit ndezur, rreth orës 22.30 të datës 12 korrik. Efektivët e policisë nuk e mbajtën në vëzhgim mjetin për të parë kush e posedonte dhe nuk njoftuan ekspertët dhe efektivët e policisë gjyqësore për të bërë këqyrjen ne vend të mjetit por e larguan në mënyrë të papërshtatshme me karroatrec duke prishur kështu të dhëna të vlefshme hetimore.
Furgoni fillimisht u transportua në komisariatin nr.2 e më pas në drejtorinë e policisë Tiranë. Burime nga policia thonë se kjo ka ardhur nga një paaftësi e efektivëve, megjithatë dyshimet mbeten se kjo mund të jetë një lëvizje e qëllimshme e tyre.
Furgoni u identifikua nga kamerat e bizneseve afër aeroportit të Rinasit, duke udhëtuar në drejtim të Tiranës fill pas grabitjes. Mjeti humbi nga kamerat në zonën e Laknasit. Nisur nga dyshimet se ky mjet udhëtonte pa targa policia angazhoi gjithë shërbimet e saj për gjetjen e këtij mjeti.
Nga këqyrja e kamerave të qytetit mjeti u identifikua në tiranë në ditët e para të korrikut, dhe më 12 korrik u identifikua në zonën e Tiranës së Re. Ekspertët dhe oficerët e policisë gjyqësorë mundën ta këqyrnin vetëm në oborrin e drejtorisë tiranë.
Grupi hetimor ka këqyrur mjetin dhe k identifikuar disa gjurmë papilare për të cilat po punohet . Burime nga policia tiranë thanë se grupi i ekspertëve po bashkëpunon dhe me disa drejtori policish në qarqe, ku dyshohet se grabitësit kanë lidhje.
Të njëjtat burime thanë për ‘News 24’ se pista kryesore e hetimit është se të njëjtët autorë kanë kryer dhe 2 grabitjet e para. Aktivitetin e tyre kriminal ky grup e zhvillon në Shqipëri dhe në Kosovë./ Doriana Bezat News 24
