Gjatë fjalës së sotme në Parlament, kreu i grupit parlamentar Taulant Balla ka zbuluar një detaj nga aksioni i policisë pas grabitjes së Rinasit. Balla tha se përveç vrasjes së Admir Muratajt, efektivët e Forcave të Ndërhyrjes së Shpejtë kanë plagosur edhe një prej grabitësve. Kjo sipas Ballës është shenjë se me siguri brenda pak ditësh, policia do të arrijë të zbulojë dhe të arrestojë autorët e ngjarjes.
“Më lejoni t’ju them në emër të mazhorancës se dua ta falenderoj Policinë e Shtetit, për reagimin pas kaq shumë vitesh jo vetëm në kohë, por edhe të vënë në një sulm me armë të rënda, granata apo automatikë, Policia e Shtetit ka arritur të asgjësojë një prej kriminelëve, të ketë plagosur një tjetër dhe të jeni të bindur se deri javën tjetër rezultatet do të jenë të tilla, që të paktën të merrni mundimin siç nuk e morën kolegët tuaj pararendës, për të falenderuar Policinë e Shtetit për rezultatet e arritura”, ka thënë Taulant Balla./Opinion.al
