Një tjetër person është arrestuar nga policia pasi dyshohet se është i përfshirë në grabitjen e ndodhur pak ditë më parë në aeroportin e Rinasit. Mësohet se policia ka arrestuar në Shkëmbin e Kavajës shtetasin kosovar Ragip Haxhiajdini, 50 vjeç.
Më herët, Alkond Bengasi, gjithashtu i arrestuar, e përshkruante atë si njeriun që takonte shpesh Admir Muratajn dhe Klement Çalën.
LEXO EDHE:“Do dëgjosh një tronditje të madhe”, çfarë më tha Klement Cala në shtëpi
Sipas Bengasit kosovari thirrej ndryshe edhe me nofkën “Daja”. Tashmë në total janë arrestuar 6 persona të dyshuar si të përfshirë në grabitje.
Të arrestuarit janë shtetasit Oltian Veseli, Alkon Bengasi, Renaldo Sula, Saimir Çela dhe Elton Pikli.
Njoftimi i policisë
Në vijim të veprimeve të kryera nga një grup i posaçëm hetimor për zbardhjen e ngjarjes së datës 09.04.2019 në aeroportin e Rinasit, informojmë se është kapur dhe ndalur shtetasi R.H., 50 vjeç, lindur e banues në Pejë, i dyshuar si një prej autorëve të kësaj ngjarje. Materialet procedurale i kaluan Prokurorisë Pranë Gjykatës së Shkallës së Parë për Krime të Renda Tiranë, për veprën penale te “Vjedhjes me armë të kryer në bashkëpunim, në kuadër të grupit të strukturuar kriminal”, “Mbajtjes pa leje të municioneve luftarake”, “Vrasje e punonjësve të policisë, e kryer ne bashkëpunim e mbetur në tentativë”, parashikuar nga nenet 140 e 25 dhe 333/a,” 279, 79 b dhe 278 C, të Kodit Penal./ Opinion.al E.Xh.
