Një grabitje u regjistrua ditën e sotme lagjen nr. 7 të qytetit të Korçës. Mësohet se një 25-vjeçar nën kërcënimin e thikës vodhi 92.800 lekë të reja në një zyrë për dhënie kredie.
Më pas ai është larguar me shpejtësi, por vetëm pak minuta më vonë ai u arrestua nga policia. Policia njofton se i arrestuari është identifikuar me inicialet shtetasit Dh. D, banues në Korçë.
Gjatë kontrollit fizik të autorit, efektivët e policisë gjetën dhe sekuestruan shumën e lekëve të vjedhura dhe thikën me të cilën autori kërcënoi personelin për të marrë paratë.
Tashmë,i riu akuzohet për “Vjedhja me dhunë” dhe “Prodhimi, mbajtja, blerja apo shitja pa leje e armëve të ftohta”./
Njoftimi i policisë
Korçë. Policia identifikon, lokalizon dhe arreston brenda pak minutash autorin e vjedhjes në një zyrë për dhënie kredie, nën kërcënimin e thikës.
Gjendet dhe sekuestrohet edhe shuma prej 92.800 lekësh të reja dhe thika me të cilën autori kërcënoi personelin për të marrë lekët.
Shërbimet e Komisariatit të Policisë Korçë, pas marrjes së informacionit se në lagjen nr. 7, në një zyrë e cila shërben për dhënie kredie, kishte hyrë një shtetas i paidentifikuar, i cili duke kërcënuar personelin e zyrës me një thikë, dyshohet se ka marrë një sasi lekësh dhe më pas është larguar me shpejtësi, organizuan punën për identifikimin dhe kapjen e tij.
Falë reagimit në kohë, rrethimit të zonës dhe informacioneve të marra u bë i mundur identifikimi, lokalizimi, kapja dhe arrestimi i autorit të dyshuar, shtetasit Dh. D, 25 vjeç, banues në Korçë, i cili po lëvizte me shpejtësi në një rrugicë, në lagjen nr. 4 Korçë.
Gjithashtu, shërbimet e Policisë, gjatë kontrollit fizik të autorit, gjetën dhe sekuestruan shumën e lekëve të vjedhura, 92.800 lekë të reja, si dhe gjatë kontrollit të vendit përreth gjetën edhe thikën me të cilën autori kërcënoi personelin për të marrë paratë.
Materialet do t’i kalojnë Prokurorisë, për veprime të mëtejshme, për veprat penale “Vjedhja me dhunë” dhe “Prodhimi, mbajtja, blerja apo shitja pa leje e armëve të ftohta”./ Opinion.al
