Një çift bashkëshortësh kanë rënë viktimë e një tentative grabitjeje të mërkurën në darkë në rrugën “OSBE” në Kamëz, ku dy persona të paidentifikuar qëllojnë për vdekje pronarin e dyqanit ushqimor dhe plagosin bashkëshorten.
Burimet e para nga policia thanë se dy grabitësit kanë kërkuar një shumë parash dhe sende të tjera me vlerë, por kanë hasur në rezistencën e pronarit, i cili fillimisht mbeti i plagosur, së bashku me bashkëshorten e tij.
Viktima është Agim Buci 52-vjeç, ndërsa bashkëshortja e tij e cila mbeti e plagosur është Merita Buci 44 vjeçe.
Dy të plagosurit u dërguan me urgjencë drejt spitalit, por fatkeqësisht burri nuk arriti t’u shpëtojë plagëve të marra dhe ndërroi jetë në spital, ndërsa gruaja është jashtë rrezikut për jetën.
Në një njoftim paraprak, policia sqaron si më poshtë:
Më datë 25.04.2017, rreth orës 21:07, ka ardhur njoftimi se në rrugën “OSBE”, ka plagosje me armë zjarri. Menjëherë në vendngjarje kanë mbërritur shërbimet e policisë dhe ambulanca ku nga verifikimet paraprake ka rezultuar: Në rrugën “OSBE”, janë plagosur me armë zjarri në një dyqan shtetasit A. B., dhe M. B., (burrë dhe grua) nga persona ende të paidentifikuar.
Shtetasit e plagosur janë dërguar për ndihmë mjekësore në spital, ku shtetasi A. B., ndërroi jetë, ndërsa bashkëshortja ndodhet në gjendje të rëndë shëndetësore.
Janë ngritur pika kontrolli në çdo rrugë dhe hyrje – dalje të Kamzës e në pika të tjera. Vazhdon krehja e zonës dhe kontrolli i territorit. Grupi hetimor në vendngjarje po punon për identifikimin dhe kapjen e autorit
