Me anë të një njoftimi për shtyp nga selia blu, kreu i Partisë Demokratike, Lulzim Basha, ka dënuar dhunimin e ambienteve të “Zjarr Tv”. Basha vijon më tej duke bërë thirrje për zbardhjen e kësaj ngjarjeje nga policia, ndërsa akuzon edhe kryeministrin Rama për nxitje të këtyre veprimeve ndaj medias.
Njoftimi i PD-së
Kryetari Basha dënon dhunimin e “Zjarr TV”. Rama nxitës i dhunës.
Dhunimi i një redaksie lajmesh, është një ngjarje e rëndë, që tregon për ambjentin e vështirë mediatik në vend.
Duke dënuar aktin e dhunshëm ndaj televizionit “Zjarr TV”, Partia Demokratike i bën thirrje organeve të rendit e të ligjit, të zbardhin sa më shpejt ngjarjen.
Media sot në tërësi është e pambrojtur, aq më tepër kur është një zë kritik ndaj qeverisë. Klimën më të rëndë ndaj medias, e krijon vetë kryeministri. Të quash çdo ditë kazan televizionet, gazetat, portalet dhe përfaqësuesit e medias, në fakt nxit akte dhune ndaj medias.
