Vëllezërit Klement dhe Eldi Çala, të akuzuar për një sërë grabitjesh më armë dhe dhunë në zonën e Rinasit dhe në aeroportin e Rinasit, janë vënë në pranga pas një megaoperacioni të policisë, ku kanë marrë pjesë rreth 300 forca policore.
Bëhet e ditur se operacioni është zhvilluar nga Departamenti i Policisë Kriminale, Forca e Posaçme Operacionale në Policinë e Shtetit, njësia speciale FAST Albania, RENEA dhe Drejtoritë Vendore te Policisë Durrës, Tiranë e Elbasan.
Përveç arrestimit të dy vëllezërve, policia ka bërë të mundur sekuestrimin e armëve dhe sasi të mëdha vlerash monetare, si dhe automjete.
Vëllezërit Çala, lidhen ngushtë me ngjarjen e bujshme të 9 prillit të vitit të kaluar në Rinas, ku u morën rreth 4.6 milionë euro.
Një grup personash arritën që të marrin sasinë e parave të transportuara me blinda nga bankat e nivelit të dytë në Shqipëri jashtë vendit.
Po ashtu pati edhe një përplasje me Policinë, nga ku mbeti i vdekur Admir Murataj, person afër Klement Çalës pasi së bashku dyshohen se kanë grabitur blindat po 2 vite më parë afër Rinasit.
Por lidhja e Muratajt me Klement Çalën është më e hershme. Ai ka qenë i akuzuar nga Greqia për grabitjen e 1 milionë eurove bashkë me Admir Muratajn të Bankës Kombëtare Greke në qendër të qytetit të Larisës dhe ishte shpallur në kërkim që prej vitit 2013.
Për grabitjen e 4.6 milionë në pistën e aeroportit në qeli ndodhen 7 persona, i cilësuari si daja nga Kosova Ragio Hajdini, Elton Pikli, Renaldo Sulaj, Oltion Veseli, Saimir Cela, Alkond Bengasi dhe Hasan Kanaci./Opinion.al
