Pas punonjësve të policisë private, që shoqëronin dy blinda me para të BKT, që ra dje pre e grabitjes në Qafë Kashar, sot është arrestuar dhe drejtori teknik i shoqërisë private, Fatmir Gapi 55-vjeç.
Ndërsa mbrëmjen e djeshme u arrestuan Xhelil Metaj, 43 vjeç punonjes SHPSF, Gentian Dedja, 31 vjeç punonjes SHPSF, Perparim Logu, 39 vjeç , punonjes SHPSF, Endrit Daçi, 31 vjeç , shofer i shoqerise, Dashamir Balla, 42 vjeç shofer i shoqerise.
Policia tha se rregulli kryesor i transportit të parave është që thasët e parave të kenë GPS. Nuk dihet se për cfarë arsye, asnjë nga thasët e vjedhur të parave, nuk ka GPS. Vetëm në njërin thes, që ishte poshtë sediljes së shoferit, ka GPS, kështu që, bëhet e pamundur të gjenden paratë nëpërmjet GPS. Po ashtu, edhe kamerat e blindit kanë qenë të fikura, cka shton dyshimet e policisë për një mirëorganizim në vjedhjen e lekëve.
“Ne vendngjarje jane konstatuar dy automjete të pershtatura si te blinduara të një shoqërie private, që po transportonin në drejtim të Rinasit vlera monetare.
Në këtë aks rrugor këtyre mjeteve u është ndërprerë rruga nga një automjet tip fuoristradë duke e goditur furgonin e blinduar të shoqërisë private dhe prej tij kanë dalë dy persona të paidentifikuar të cilët dyshohen të kenë qëlluar me armë gomën e përparme të makinës së parë dhe me anë të një sendi të fortë kanë thyer xhamat e automjetit të blinduar duke zbritur me forcë punonjësit e policisë private dhe duke i shtrirë në tokë.
Në të njëjtën kohë një tjetër automjet i dyshuar i autorëve kanë sulmuar makinën e shoqëruese të dytë te shoqërisë private duke neutralizuar punonjësit e shoqërisë private të cilët ndodheshin në të. Pasi kanë marrë sasinë e parave , ata janë larguar me të dy automjetet e tyre”, tha policia e Tiranës.
