Mbrëmjen e së dielës në orën 21:40 në rrugën ‘Njazi Meka’ në zonën e Alliasit dy persona hynë në banesën e Petrit dhe Afërdita Laze për të grabitur por pasi u ndeshën me kundërshtimin e të zotëve të shtëpisë i qëlluan ata me armë zjarri duke i plagosur. Petrit Laze mori një plumb në bark ndërsa gruaja e tij në kofshë. Ata tashëm ndodhen jashtë rrezikut për jetën.
Afërdita Laze është pyetur nga policia në lidhje me ngjarjen dhe ka deklaruar se grabitësit kërkonin lekë por pasi kishin qëlluar kishin ikur me vrap.
“Ishim në dhomë, dëgjuam një zhurmë. Dëgjuam vajzën që bërtiti ‘kush është aty’.
Pasi dëgjuam zhurmën doli Petriti të shihte. Petriti u ndesh në korridor me dy veta të maskuar. Dukeshin të rinj, bërtisnin vetëm ‘lekët, lekët’. Më pas i drejtuan Petritit pistoletën. Petriti tentoi ti nxirrte jashtë nga shtëpia por ata e qëlluan. Kur u afrova më qëlluan edhe mua. Pastaj ikën me vrap”, mësohet të ketë thënë ajo.
Policia dyshon se autorët e grabitjes kanë qenë persona të cilët e kanë njohur çiftin pasi ata e dinin se në derën e pasme nuk kishte kamera sigurie dhe se pronarët e shtëpisë kishin planifikuar të udhëtonin mbrëmjen e së dielës.
Një tjetër detaj që përforcon këtë pistë është edhe fakti që autorët kanë shkuar direkt në dhomën ku dyshohet se çifti mbante lekët, por ende nuk konfirmohet nëse kanë arritur që të marrin gjë. Dyshimet janë se autorët që kanë vepruar kanë qenë tre, dy u futën brenda për të grabitur, njëri me armë për të kërcënuar dhe tjetri për të kontrolluar, ndërsa i treti i priste jashtë me makinë për t’u larguar me shpejtësi. Mjegulla e dendur ka bërë që Policia të mos identifikojë dot mjetin me të cili u larguan grabitësit.
Policia ndërkohë ka shoqëruar në komisariat për të marrë në pyetje punëtorët e biznesit të çiftit dhe fqinjë të cilët janë persona që e njihnin shtëpinë dhe lëvizjet e tyre. /Opinion.al
