Dy autorët e grabitjes së bankës së nivelit të dytë në zonën e ish-Bllokut, kanë punuar për hapjen e murit dhe në orët e para të mëngjesit të së shtunës.
Kjo është vërtetuar nga sinjali i alarmit që ka rënë rreth orës 5 të mëngjesit dhe që sipas hetuesve është neglizhuar nga ana e drejtorit të degës, i cili vetëm në orën 10:00 të paradites, ka urdhëruar personin përgjegjës të sigurisë që të shkonte në bankë dhe të bënte kontroll.
Në të gjitha alarmet e rëna nga e premtja në mbrëmje deri të shtunën, kur sipas hetuesve janë marrë paratë, pretendimi që kanë ngritur si Drejtori i bankës Luigj Gjonaj dhe Florian Skarra, shef i sigurisë së filialit është se pas kontrolleve nuk kanë konstatuar asnjë lëvizje të dyshimtë dhe kanë menduar se sinjali i alarmit binte nga ndonjë insekt i mbetur brenda degës ose lëvizje të minjve.
Rezulton se në dy prej rasteve kur ka rënë alarmi, dy punonjësit Gjonaj dhe Skarra kanë hapur derën e kasafortës dhe kanë kqyrur pa u futur më në brendësi të dhomës se paratë ishin të palëvizura.
Burime nga grupi hetimor, thanë se autorët kanë punuar me vegla pune, si daltë e çekiç, për të mos bërë zhurmë. Veglat e gjetura në vendin e ngjarjes, bishta cigaresh dhe shishe uji, janë dërguar për ekspertizë. Vetëm njëri nga autorët është futur në dhomën kasafortë.
Sipas policisë, në kamerat e rrugës evidentohen se gjatë mbrëmjes së të shtunës, datë 6 Gusht, konstatohen dy persona që me çantë në dorë largohen nga pallati të kamufluar me kapele dhe për shkak të cilësisë së dobët të kamerave, nuk arrihen të shquhen tipare të fytyrave që do të ishin të vlefshme për hetimin.
Sipas burimeve nga grupi hetimor, autorët para se të punonin për hapjen e murit të bodrumit që të lidh me dhomën kasafortë, kanë bërë të mundur bllokimin e bravës së derës krysore, në mënyrë që të mos hapej në rast dyshimesh. /Tv Klan
