Të tjera detaje janë zbardhur lidhur me grabitjen e argjendarisë të ndodhur pasditen e së martës në Kamëz.
Në grabitje kanë marrë pjesë katër persona, tre të cilët u futën në argjendari dhe një prej tyre ishte shoferi i makinës me të cilën u larguan autorët .
Pronarja e argjendarisë, e cila në momentin e grabitjes ka qenë e shoqëruar me nusen e djalit, ka rrëfyer para policisë të gjithë ngjarjen, duke theksuar se janë kërcënuar me armë zjarri.
Pavarësisht se pronarja ka tentuar ti ndalojë, grabitësit kanë mundur të marrin 1.5 kg flori.
“Ka ndodhur rreth orës 17:15, hera e parë që na ndodh diçka e tillë. Ata ishin 4, shoferi i BMW qëndroi në makinë, te grabitësit hynë në argjendari njëri pas tjetrit, me maska me doreza dhe të tre të veshur me të zeza komplet. Argjendaria ka dy kamera jashtë dhe dy brenda, filmimet i ka policia, na ka sekuestruar DVR-në. Unë N.S, 59 vjeçe dhe nusja e djalit E.S 31 vjeçe kemi qenë këtu kur ndodhi ngjarja. Veprimi i parë që bëri grabitësi ishte drejtimi i armës nga ne dhe tha: Duart lartë se ju vramë. Nuk kam thënë në polici që kishte dialekt jugor, ai e trrashi zërin enkas që të mos dallohej, ndërsa dy të tjerët nuk folën fare dhe nuk u përmend asnjë emër mes tyre. Nuk kam kuptuar asnjë dialekt nga ata. Jam përleshur me grabitësin që mbante armë, më shtyu më hodhi në tokë, u përlesha dhe me dy të tjerët që t’i ndalojë të vidhnin, por më shtynë. U dorëzova, mbrojta nusen e djalit te cilën e futa te dhoma pas. Ata hynë lirshëm dhe dolën lirshëm pasi nuk kemi sistem që i ndalon ata të hapin derën si nga jashtë dhe nga brenda. Nga një llogari paraprake që kemi bërë konstatojmë mbi 1.5 kg flori të vjedhur, unaza, varëse, byzylykë dhe vathë, disa ishin të veçantë të personalizuar me porosi, dhe kushtojnë, rreth 50.000 dëm. Jemi të frikësuar se mos autorët nuk kapen dhe kjo gjë përsëritet. Banakun e kemi boshatisur s’kemi mall në vitrinë”.- tha pronarja e argjendarisë.
