50-vjeçari Ragip Haxhiajdini ka mohuar të ketë lidhje me grabitjen e 9 prillit në Rinas, ku u morën 6.5 milionë euro. Madje ai ka patur dhe një alibi duke thënë se hetuesve iu vinte në dispozicion materiale video, që tregonin gjithë lëvizjet.
Por autoritetet kanë kërkuar zbardhjen e tabulateve telefonike të 50-vjeçarit si dhe komunikimet që ka patur në rrjetet sociale. Ka dyshime të forta, thonë hetuesit, se duke u nisur dhe nga e kaluara e tij, “Daja” mund të ketë ndihmuar grupin në infrastrukturë për të siguruar furgonin nga Kosova si dhe për hartimin e planit për supërgrabitjen.
Ndërkohë kërkime të shumta po zhvillohen dhe për persononin tjetër të dyshuar, me pseudonimin Tani. Ai dhe të tjerët dolën nga dëshmia e dhënë nga Alkond Bengasi, që bashkëpunoi me drejtësinë, pasi gjurmë të gishtave të tij u gjetën në furgonin me mbishkrimin “Hetimi Tatimor”
Sipas dëshmisë së Bengasit, ai ishte i gjatë rreth 180-185 cm me origjinë nga Fushë-Kruja me pak mjekër si edhe besimtar i fesë islame. Nisur nga karakteristikat e përcaktuara nga Bengasi, dyshohet se “Tani” të jetë edhe komandoja që shihet në këtë foto pas krahëve të të ndjerit Admir Murataj, gjatë aksionit për grabitjen e disa miliona euro, pikërisht brenda pistës së avionit në Rinas.
Për këtë arsye, prokuroria ka kërkuar ndihmën e ministrisë së Mbrojtjes për të krahasuar në databazën e saj nëse personi i cili duket nga ana vizive me veshje kamuflazhi ushtarake ka qenë ndonjëherë në radhët e ushtrisë.
Për prangosjen e “Tanit”, FNSH dhe RENEA, zhvilloi një operacion të gjerë ditën e enjte në qytetet e Krujës, Fushë-Krujës dhe Elbasanit por pa rezultat. Dyshohet se personi i shpallur në kërkim të jetë larguar në drejtim të Kosovës, bashkë me vëllezërit Klement dhe Eldi Çala./Opinion.al
