Një nga të arrestuarit e fundit, si të përfshirë në grabitjen e Rinasit ka lidhje të hershme me Klement Çalën, i shpallur në kërkim për një tjetër grabitje dhe që njihet si ekspert në ktë fushë.
Bëhet fjalë për Alkond Bengasi, i cili gjatë vitit 2015, kur u arrestua dhe Çala, ai përfundoi pas hekurave. Ishte operacioni i koduar “Streha e fundit” që në atë kohë vuri në pranga dy të rinjtë.
Policia konfirmoi sot arrestimin e Alkond Bengasit, i cili rezulton i dënuar më parë dhe për prodhim dhe shitje narkotikësh. Bashkë me 34-vjeçarin janë vënë në pranga edhe Oltion Veseli, 38 vjeç, banues në Krujë, Saimir Çala, 28 vjeç, si dhe Renaldo Sula 25 vjeç.
Sipas autoriteteve, gjatë kontrolleve janë gjetur dhe sekuestruar në cilësinë e provës materiale, prova të shumta të cilat do të shërbejnë për thellimin e hetimeve dhe zbardhjen e plotë të ngjarjes.
Kush është Klement Cala?
Klement Cala vazhdon të jetë i lirë dhe ka qenë nën hetim më herët si njëri nga autorët e grabitjes së dhunshme të 3.2 milionë eurove që po transportoheshin drejt Rinasit, një episod i cili kishte në grup edhe ish-komando.
I riu nga Elbasani, ishte pjesë e grupit pjesëmarrës në një nga arratisjet më të bujshme në shtetin grek të ndodhur në vitin 2013. Pas një lufte më shumë se 30 minuta mes disa personave të armatosur dhe gardianëve të burgut, ai mundi të largohej nga tarraca së bashku me Ilir Kupën dhe Fatos Sulajn.
Pavarësisht se policia greke ndërmori aksione të shumta për kapjen e tyre për ditë të tëra, Klement Çala arriti të hyjë në Shqipëri së bashku edhe me të burgosurit e tjerë të arratisur.
Ai u arrestua dy vjet më vonë. Në qershor të 2015-s, ai ra në prangat e Policisë së Vlorës, gjatë një operacioni të koduar “Streha e fundit”. Nga hetimet rezulton se Çala ishte pjesë e grupit organizator që hapën zjarr mbi gardianët grekë dhe arratisjes se bujshme. Ai ndodhej i burgosur për akuzën e vrasjes, krijimit të organizatave kriminale, vjedhjes me dhunë dhe zjarrvënies së qëllimshme./Opinion.al
